სოციალურ სივრცეში მედიის როლი თავი I
სოციალურ სივრცეში მედიის როლი
სოციოლოგია საზოგადოების თანამედროვე ცხოვრებაში
სოციოლოგიის მიზანია, გამოიკვლიოს ადამიანის საზოგადოებრივი ცხოვრება, ამ გამოკვლევის მიზანი კი არის, გავიგოთ ის პროცესები, რომელთაც მსოფლიო მასშტაბის თანხმობის დამყარებასთან მივყავართ [1]. მეცნიერული ობიექტურობის აუცილებლობა არის სოციოლოგიის, როგორც დამოუკიდებელი მეცნიერების მოთხოვნა [2.18]. მეცნიერთა უმრავლესობა თანხმდება იმაზე, რომ სოციალური მეცნიერება არის სარკე, რომელშიც უნდა ჩაიხედოს საზოგადოებამ, ქვეყანამ [3.11]. თუმცა როგორც ალფრედ ვებერი წერს, უნდა განვასხვაოთ საზოგადოებრივი პროცესი, ცივილიზაციის პროცესი და კულტურული მოძრაობა [4].
სოციალური მეცნიერება საშუალებას გვაძლევს ნათლად დავინახოთ, როგორია ჩვენი საზოგადოება. სოციალური მეცნიერების ფუნქციაა, კრიტიკული თვალით განიხილოს სხვადასხვა სახელმწიფო და სოციალური ინსტიტუტები: ხელისუფლება, მართლმსაჯულების სისტემა, პოლიცია, პოლიტიკური პარტიები, მედია და ა.შ.[3.13]. სოციალურ მოვლენების შესწავლისას უნდა გვახსოვდეს, რომ"მათ თეორიულთან ერთად პრაქტიკული ღირებულებაცგააჩნიათ. გარდა ამისა, ხილული ფაქტების უკან ძალიან ხშირად ათასობით უხილავი მიზეზი იმალება"[5.4]. სოციოლოგები ცდილობენ, ყურადღების კონცენტრაცია პრობლემურ სფეროებზე მოახდინონ [3.3].
XXI საუკუნე სოციალურ ცვლილებათა არნახულად სწრაფი ტემპით გამოირჩევა. სოციალური ცვლილებები ისეთი სიჩქარით მიმდინარეობს, რომმათთან შეგუებას ვერ ვასწრებთ... ასეთი დაჩქარებული ცვალებადობა ისტორიული ყოფიერების ჩვეულ რიტმს არღვევს, იწვევს სოციალურ სისტემათა შორის უთანასწორობას. ეს განსაკუთრებით მკვეთრად შეიგრძნობა ადამიანისა და მის მიერ შექმნილი მეცნიერებისა და ტექნიკის განვითარების დონეთა შორის. ადამიანი ზოგ შემთხვევაში მეცნიერებისა და ტექნიკის ზრდას ჩამორჩა [6]. თუმცა ამ შემთხვევაშიც კი სოციოლოგიამ არც მორალისტის და არც მსაჯულის პოზიცია არ უნდა დაიკავოს [3.75]. "ჩვენი ყოველდღიური რუტინა თითქმის მუდმივი ურთიერთობებით სხვებთან ჩვენი საქმიანობის ხასიათსა და სახეს აყალიბებს. მისი შესწავლით, ჩვენ შეიძლება ძალზე ბევრი რამ შევიტყოთ საკუთარი თავის, როგორც სოციალური არსებების და, საკუთრივ, სოციალური ცხოვრების შესახებ, ჩვენი ცხოვრება დღიდან დღემდე, კვირიდან კვირამდე და წლიდან წლამდე ქცევის ერთგვაროვანი მოდელით ყალიბდება... ფაქტობრივად, ყველა დიდმასშტაბიანი სოციალური სისტემები სოციალური ურთიერთქმედების იმ მოდელზეა დამოკიდებული, რასთანაც ყოველდღიურად ვართ დაკავშირებული" [7.70]. ასე რომ, სოციალურია ცხოვრების ყველა პრობლემა. ასევე, სოციალური პრობლემაა პიროვნების ჩამოყალიბებაც. თუმცა ეს სოციალურ-ინდივიდუალური პროცესიცაა.
"აღზრდის ამოცანაა მოცემულ სოციალურ გარემოში, რაც შეიძლება, ფართოდ და ყოველმხრივ გამოავლინოს და განავითაროს პიროვნების შესაძლებლობები და უნარები" [8.221].
პიროვნების სოციალიზაცია მისი ცნობიერების გამდიდრებას გულისხმობს. შეუძლებელია პიროვნების ჩამოყალიბება ცნობიერებისა და მოქმედების ერთიანობის გარეშე [9.89]. ფაქტობრივად, აღმოჩნდა, რომ ინდივიდები როგორც კი სოციალურ გარემოში ხვდებიან, ერთდროულად სხვადასხვა მიმართულებით ვითარდებიან.
ადამიანები სადაც იბადებიან და ცხოვრობენ, იმ სოციალური გარემოსა და კულტურის პროდუქტად ყალიბდებიან. ბიჰევიორისტები და სოციალური დასწავლის თეორეტიკოსები ასე ფიქრობენ. მათი აზრით, "პიროვნება გარე სამყაროსთან ურთიერთქმედების გზით ყალიბდება" [10.93]. მაქს ვებერი (1864-1920 წწ.) ერთ-ერთი თვალსაჩინო გერმანელი ინტელექტუალი, სოციოლოგი, თვლიდა, რომ "ადამიანთა კულტურული იდეები დამოუკიდებელ და მნიშვნელოვან როლს ასრულებს თავიანთი მოქმედებების ჩამოყალიბებაში" [11.45]. ნაშრომში გვსურს განვიხილოთ, როგორ მოქმედებს პიროვნებაზე საზოგადოება, სოციალური ცვლილებები და მასმედია.
1.2. პიროვნება საზოგადოებაში და განწყობის თეორია
სხვადასხვაა და განუსაზღვრელი სამყაროს ფასეულობები. კაცობრიობა ფასეულობებს საზოგადოებრივ-პოლიტიკური პრაქტიკის პროცესში არა მარტო ქმნის, აფასებს კიდეც მას [12.146]. "ჩვენ საზოგადოების შემქმნელები ვართ, თუ საზოგადოებამ თავად შეგვქმნა ჩვენ?" [13.168]. "რა არის "საზოგადოება" – კითხულობენ კრიტიკოსები – თუ არა მრავალი ინდივიდუალური ქმედების ერთიანობა? ჩვენ საზოგადოე-ბის მიერ შექმნილები კი არ ვართ, მისი შემქმნელები ვართ. ამ ორ შეხედულებას შორის განსხვავება, შესაძლოა, მაინც გაზვიადებულია, თუმცა არ შეიძლება ორივე მართალი იყოს. ერთი შეხედვითაც მათ შორის კავშირი საკმაოდ ადვილად დასანახია.
თავის ცხოვრებაში ადამიანი, რომელიც საზოგადოების წევრია, უამრავ გადაწვეტილებას იღებს – დიდსა თუ პატარას, რომელიც შეიძლება "მასობრივ" და "ერთჯერად" გადაწვეტილებებად დაიყოს. ადამიანები მასობრივ და ერთჯერად გადაწყვეტილებებს კარგად ასხვავებენ. რაოდენ გასაკვირიც უნდა იყოს, ისეთი სიტუაციები საკმაოდ ბევრია, როდესაც სულ ერთია, რას აირჩევენ. მაგრამ ერთჯერადი გადაწვეტილებების მიღების დროს ადამიანის გონება საკმაოდ აქტიურად და დაძაბულად მუშაობს. არჩევანისას ინფორმაცია, რომელსაც ამ საკითხთან დაკავშირებით ფლობს ადამიანი, გადამწვეტ როლს იძენს. უამრავ შემთხვევაში ადამიანს თავისუფალი არჩევანის გაკეთება არ შეუძლია [14. 109].
ადამიანის ქცევა, ან უფრო სწორად, მისი ქცევათა სისტემა, შეიცავს თავის საკუთარ კანონზომიერებათა სისტემას, რომელიც აუცილებლად უნდა შეისწავლოს ისეთმა მეცნიერებამ, როგორიცაა ფსიქოლოგია. ადამიანის ქცევაში ვლინდება ადამიანის სულიერი სამყარო და განსაკუთრებულ სინამდვილეს წარმოადგენს... ქცევას, როგორც ადამიანის მიერ განხორციელებულ აქტივობას, ხშირად თან ერთვის ცნობიერება. ჯერ კიდევ დ. უზნაძე მიუთითებდა, თუ ადამიანის ქცევას მისი შინაგანი შინაარსების, განცდებისა და ცნობიერების გარეშე განვიხილავთ, მაშინ ხელში შეგვრჩება ცალკეული მოძრაობის ჯაჭვი, რომელშიც შეუძლებელი იქნებოდა