წინასიტყვაობა ამბობენ, ქუჩაშია მშვენიერება,
მაგრამ მიმოვიხედე და
მარცხი უფრო დავინახე
Defiance Ohio*
*პანკ-როკჯგუფი ოჰაიოდან
წიგნი ეძღვნება სიუ დანიელსის (1960-2004) ხსოვნას, ბრწყინვალე ეკოლოგის, გაბედული ფემინისტის, მგზნებარე ანარქისტის, ლამაზი და მზრუნველი ადამიანის, რომელიც გარშემო მყოფებს ბრძოლაში იწვევდა და ყოველთვის ხელს უწყობდა მათს განვითარებას. შენი სიმამაცე და სიბრძნე ჩემთვის დღესაც შთაგონების წყაროა და, ამ გაგებით, შენი სული კვლავ დაუმორჩილებელია...
...ასევე ეძღვნება გრეგ მაიკლს (1961-2006), რომელიც მთელი თავისი არსებითა და ჩვენი სამყაროს მომწამვლელი შხამების წინააღმდეგ დაუღალავი ბრძოლით, ყველაზე არაჯანსაღ გარემოშიც სიჯანსაღის განსახიერება იყო. ციხის სამზარეულოში მოპარული ქიშმიშებით დაწყებული, მაღალ მთებში, ჩემი გონების გამოღვიძებით დამთავრებული, შენი საჩუქრები ჩემთვის მალამოდ და იარაღად დარჩება იქამდე, ვიდრე უკანასკნელი ციხე ქვების გროვად იქცევა.
განსაკუთრებული მადლობა - მეგანს, პატრიკს, კარლს, გოპალს, სიუ დ.-ს, შესწორებებისა და გამოხმაურების გამო, ხოლო სიუ ფ.-ს, ჯეიმსს, აირისს, მარკს, ედის, ალექსანდრეს, ჯესიკას, ესტერს და ყველას, ვინც სემინარზე მოვიდა, - კრიტიკის გამო, რომელსაც წინამდებარე მეორე გამოცემის მომზადებისთვის დიდი მნიშვნელობა ჰქონდა.