შტეფან ცვაიგი მე-20 საუკუნის უდიდესი ავსტრიელი მწერლია, რომლის ემოციურად და ფსიქოლოგიურად დატვირთული ნოველები გულგრილს არავის ტოვებს. ადამიანის განცდათა სიღრმე, მრავალმხრივობა თუ განსაკუთრებულობა ცვაიგივით, ალბათ, არავის ესმოდა. შესაბამისად, ამ განცდათა ანალიზი და ლიტერატურულ პერსონაჟებზე მორგებაც მისნაირად არავის გამოსვლია. ცვაიგის ნოველები ხასიათთა საოცარი, ამოუწურავი გამაა, ემოციებისა და გრძნობების კიდობანია. #იკითხეკლასიკა ცვაიგის ექვს ნოველას – მძაფრ განცდათა დამტევ-გამომხატველ ამბებს გთავაზობთ. აქ გელოდებიან პერსონაჟები, რომელთაც „მუდამდღე ათასი მიზეზი გაუჩნდებათ აღელვებისთვის“, პერსონაჟები, რომელნიც გულისცემასავით ასდევნებიან საყვარელი ადამიანების გზას.