რეალური არსებები ჩვენს გვერდით მცხოვრები ადამიანები არიან. დაღლილი, იმედგაცრუებული, შეყვარებული და ზოგჯერ თავზეხელაღებული ადამიანები. ან იქნებ ისინი თავად ჩვენ ვართ... რეალური ცხოვრება და რეალური გრძნობები: სიყვარული, ღალატი, ეგოიზმი, შიში... ის რაც მეხსიერებაში რჩება და ხშირ შემთხვევაში, მტკივნეულ მოგონებად იქცევა. Npas4 მეხსიერების გენია, ტვინის ის უჯრედები, რომლებიც მძიმე ფსიქიკურ ტრავმებს ინახავს. წიგნის გმირი მეხსიერების გენის დაბლოკვას, ამ უჯრედების დაშლას და გადაკეთებას ცდილობს, რათა ადამიანებმა ერთხელ და სამუდამოდ დააღწიონ თავი დამთრგუნველ წარსულს. თეონა დოლენჯაშვილის რომან „რეალური არსებების“ გმირების ცხოვრება სწორედ ეს არჩევანია. არჩევანი სიცოცხლესა და სიკვდილს, სიყვარულსა და სიძულვილს, მონანიებასა და დავიწყებას შორის.