შესავალი 2014 წელს ნიუ-იორკში, აუქციონზე, რამდენიმე მილიონად გაიყიდა მარკა, რომელსაც ზოგადად მოიხსენიებენ ხოლმე „ ქაღალდის პატარა ნაგლეჯად “ . აუქციონების ისტორიაში მსგავსი მცირე ზომისა და წონის საგანში ასეთი მაღალი ფასი არასოდეს გადაუხდიათ.
მსოფლიოში მარკების უმრავლესობა ხელმისაწვდომ ფასში იყიდება და მისი შეძენა ყველას შეუძლია. თუმცა არის მარკები, რომელთა ღირებულება მაღალია და მათი შეძენა მხოლოდ დიდი შემოსავლების მქონე ადამიანებს ხელეწიფებათ.
მარკების კოლექციონერებმა იშვიათ და უჩვეულო მარკებზე „ ნადირობა “ მეოცე საუკუნეში დაიწყეს. ფილატელიაში გაჩნდა მიმდინარეობაც, რომელიც შეისწავლის განსაკუთრებით ღირებული მარკების ისტორიას. ჩნდება კითხვა, თუ რატომ ხარჯავენ კოლექციონერები დროსა და ფულს იმისათვის, რომ „ ქაღალდის პატარა ნაგლეჯი “ ჩაიგდონ ხელში. დღეს ამ კითხვაზე რამდენიმე პასუხია: პირველი, დიდი შემოსავლების მქონე ადამიანთა ნაწილი მიიჩნევს, რომ მარკა ინვესტიციების განხორციელების კარგი საშუალებაა, მეორე - ადამიანთა ნაწილი ძვირადღირებულ და იშვიათ მარკებს ფილატელისტური მისწრაფებების დასაკმაყოფილებლად ყიდულობს და ამით საკუთარ სახელს უკვდავყოფს.
წინამდებარე სერიაში მოთხრობილია ოცი იშვიათი და ძვირადღირებული მარკის პატარა ისტორია. ისინი დღესაც ინარჩუნებენ აქტუალობას. ზოგადად სერიების მიზანია საქართველოში ფილატელიის, როგორც მარკების შემსწავლელი დარგის განვითარება.
ავტორი მადლიერებით მიიღებს ყველა საქმიან შენიშვნას და გაითვალისწინებს შემდგომ სერიებში.
ჩუქება
