სატვირთომ გზატკეცილიდან გადაუხვია, გზას გაუყვა, შემდეგ მარცხნივ შეუხვია, შემდეგ მარჯვნივ და ისევ მარცხნივ. ბოლო მოსახვევში ტყავის რკალი მოწყდა ძარას და სანიაღვრე არხში აღმოჩნდა. ორმოცდაორი წუთის შემდეგ ის მაწანწალა ძაღლმა იპოვა. კბილები ჩაავლო და გაიქცა. მაღაზიის წინ მოედნის გადაკვეთისას ძაღლი შენიშნა კოჭლმა ანდრიუხა სმირნოვმა, მეტსახელად – „ყურჟვინტამ~.
პურის საყიდლად მისული ყურჟვინტა მაღაზიის გაღებას კეტზე დაყრდნობილი ელოდა და ეწეოდა. ყურჟვინტამ შეხედა ძაღლს, რომელსაც კბილებში ტყავის რკალი ჰქონდა გაჩრილი, და შენიშნა, რომ რკალზე რაღაცა ბზინავდა. ნაბახუსევს მოეჩვენა, რომ ეს ქალის ძვირფასი საათი იყო. ყურჟვინტამ სიგარეტის ნამწვი გადმოაფურთხა, იფნის კეტი მოიქნია და ძაღლს ესროლა. ძაღლმა ერთი დაიწკმუტუნა, რკალს პირი უშვა და მოკურცხლა. ყურჟვინტა კოჭლობით მიუახლოვდა რკალს, ბუზღუნით აიღო, მოხსნა ოქროს სამაგრი და სახესთან მიიტანა: „აჰა...~
უკნიდან ნაბიჯის ხმა გაისმა. ყურჟვინტამ სწრაფად ჩაიდო სამაგრი დაბამბული ჯუბის ჯიბეში, ჯოხი ძირიდან აიღო და მოტრიალდა. მას მიუახლოვდა ზონზროხა, გოროზი საშა ლოსევი, რომელიც ასევე პურის საყიდლად მოსულიყო.
რაო? – ბუზღუნით წარმოთქვა საშამ.
ვახ, საშკას გაუმარჯოს! – მლიქვნელურად გააქნია თავი ყურჟვინტამ ყურებიან თბილ ქუდში. – აი, ძაღლს გამოვტაცე!
ყურჟვინტამ საშას ტყავის რკალი უჩვენა, რომელიც ოდნავ გაზნექილიყო.
რაო? – შეუბღვირა წარბებშეკრულმა საშამ.
ესა... ისა... ძეხვია, ალბათ... კომბინატიდან მოტეხა. და ჩვენკენ დატყდა.
ძეხვი არა, ტოროლა! – საშა წარბების გაუხსნელად იცქირებოდა.
ა! – ყურჟვინტამ გრაგნილი მიმოატრიალა და უსუნა მიჭყლეტილი ცხვირით. – არა. ეს იცი, რა არი? ცხვრის ნაწლავი. ფაიზაღი! მერე ამაში გულ-ღვიძლს ტენიან. შეხე, როგორაა დახვეული?
საშამ დასიებული თვალები მიაპყრო რკალს და დაბამბული ჯუბიდან „პარლამენტის~ კოლოფი და სანთებელა ამოიღო.
ვალს როდის დააბრუნებ?
ყურჟვინტამ რკალი მუქ ნაცრისფერ ჯუბაზე მიიკრა.
საშკა, ბრატ! მე ვიყო ****, როგორც კი დედას პენსიას მისცემენ, ეგრევე – წყალი არ გაუვა!
საშამ ჩუმად გააბოლა. გადააფურთხა.
მეორე თვე დაიწყო.
საშკა, გეფიცები, კაპიკი არ მაქ ეხლა! აი, პურზე ძლივს მოვაგროვე. დედამ დილიდან მაღაზიაში გამომაგდო. კატროფილზე და კომბოსტოზე ვართ გადასული. უშაქრო ჩაის ვსვავთ. სახლი გამოღლეტილია.
საშა ჩუმად იდგა. შემდეგ კვამლი გამოუშვა.
მოკლედ, დღესასწაულებამდე არ დააბრუნებ – 31-ში მოვალ და ფანჯრებს ჩაგიმტვრევ. ახალ წელს ქროლა-ქროლით შეხვდებით.
საშკა, გეფიცები. მე ვიყო ჩათლახი...
იქნები ჩათლახი, თუ არ დამიბრუნებ. ჩათლახი ყინვაში, ***.
საშკა, გავიგე ყველაფერი. ეს... შიგნეულობა მაინც აიღე. კაია. ცხვრები რო გვყავდა, ბაბო შიგნეულობის სუფს აკეთებდა. კაი იყო. გემრიელი. აიღე, აიღე!
ყურჟვინტამ რკალი საშას ჩანთაში ჩაუგორა. საშა ხმის ამოუღებლად გაემართა მაღაზიისკენ. რიგში დადგა, შემდეგ ჭვავის პურის მეოთხედი და ორი თბილი თეთრი ბატონი იყიდა. დასახლება გადაკვეთა და შინ მივიდა.