ენ ვერონიკა

ცნობილი ინგლისელი ფანტასტის რომანი „ენ ვერონიკა“ 1909 წელს გამოვიდა და გამოსვლისთანავე დიდი აჟიოტაჟი და საზოგადოების უკმაყოფილება გამოიწვია. უკმაყოფილების მიზეზი იყო მთავარი გმირის ფემინისტური მიდრეკილებები და ასევე ის, რომ ჰერბერტ უელსს სასიყვარულო ურთიერთობა ჰქონდა ცნობილ ფემინისტთან, ქალთა მოძრაობის სულისჩამდგმელ ემბერ რივსთან, რაც რომანის წერისას მწერლის შთაგონების წყარო გახდა. წიგნში აღწერილია ახალგაზრდა გოგონას, ენ ვერონიკას, ცხოვრება, რომელიც ცდილობს პატრიარქალურად მოაზროვნე მამას გაექცეს და თავისუფალი ცხოვრებით იცხოვროს. იმ პერიოდისთვის „ენ ვერონიკა“ საკმაოდ სკანდალურ ნაწარმოებად მიიჩნიეს, გაზეთმა The Spectator-მა ის მკითხველთა გონების მომწამვლელადაც კი შერაცხა... „იმასაც უნდა შეჰგუებოდა, რომ ამ სამყაროში გოგონა მარტო ვერ იქნებოდა, ვერც პატივისცემას მოიპოვებდა, თავისუფლებაზე ხომ ლაპარაკიც ზედმეტი იყო, რადგან ყველგან ჩასაფრებულიყო ბოროტება, ხიფათი და უმნიშვნელო დამცირებები, ხიფათზე მეტად რომ აღიზიანებდა.“