განცხადებები
ვიხდი
ბოდიშს (ტანსაცმელს მხოლოდ საჭიროების შემთხვევაში).
ვყიდი
28 წლის ნახმარ, მაგრამ კარგად შენახულ მწვანე თვალებს, დაობებულ ოცნებებს და გატეხილ გულს საინტერესო შიგთავსით. ფასი შეთანხმებით.
ვცვლი
ოცნების რაინდს ცხენითურთ (ცხენის ფერი არჩევით) ერთ ჩვეულებრივ აზიატ, ქალებში მოსიარულე და მყვირალა ქმარზე. გთხოვთ, დაურთოთ ფოტოსურათი განსხვავებული სასმისით ხელში, ან უარეს შემთხვევაში აუდიოკასეტა ხვრენის ჩანაწერით (წუნია არა ვარ).
ვიყიდი
ნიჭს წიგნის გამოცემის პერსპექტივით. ვიხდი ხურდა ფულით. ვზივარ ქაშუეთის წინ, მიწისქვეშაში (პირველი კიბე, მესამე საფეხური).
ვაშენებ
ახალ, მრავალპარკუჭიან გულს შიგნით უვადოდ ცხოვრების უფლებით. ყველა მსურველი დაკმაყოფილდება.
დაიბადა
მახინჯი აზრი ცნობილი ბიზნესმენის თავში. მთელი რედაქციის სახელით ვულოცავთ და ვუსურვებთ დღეგრძელობას.
გარდაიცვალა
სიკეთე. დიდუბის პანთეონის დახურვის გამო დაკრძალვა მოხდება მუხათგვერდის სასაფლაოზე.
დავკარგე
სულის სიმშვიდე, სახლის გზა, ერთი კარგი სიზმარი, ბავშვობის მეგობარი და მადა. მპოვნელი დასაჩუქრდება.
ვიპოვე
ბავშვი დაბერებული თვალებით. პატრონმა ძებნა შეწყვიტოს, მაინც არ დავუბრუნებ.
მაქვს
აშლილი ნერვები, დაჭრილი ხელები და უსაზღვრო ამბიცია. სურვილის შემთხვევაში გიწილადებთ უფასოდ.
ეწყობა ექკურსია
გონების ლაბირინთში. რადგან დაგეგმილია შესვლა ყველა ბნელ გამოქვაბულში, გთხოვთ სუსტი ნერვების, ნაინფარქტალი და წნევიანი ხალხი ნუ წამობრძანდებით. სამედიცინო დახმარება იქაც ცუდად მუშაობს.
ვასწავლი
ღამეების გადაბმულად თევას, ამოღამებული თვალების ლამაზად ჟუჟუნს, მობილურის და ჭურჭლის დაუზიანებლად სროლას კედლისთვის; სხვის გაღმერთებას და საკუთარი თავის არდაფასებას. გადახდა მხოლოდ ღიმილის ვალუტაში („პოსლეზე“ არ ვმუშაობ).
ვისწავლი
ფეხებზე დაკიდებით ცხოვრებას (ლოთებისა და ნარკომანებისგან უკვე ვცადე, მაგრამ უშედეგოდ. ამიტომ ვეძებ სხვა, უფრო მძიმე კატეგორიას).
მოვუვლი
მოხუცებულ დარდს, ოღონდ არა ლოგინად ჩავარდნილს. გავასეირნებ, დავაპურებ, წავუკითხავ ჟურნალ-გაზეთებს. საჭიროების შემთხვევაში გავუთევ ღამეს.
ქირავდება
ტვინის ხვეულები ნიჭიერ შემოქმედზე. გაქირავების პერიოდში შექმნილ ნაწარმოებებზე სანახევროდ საავტორო უფლებით. გთხოვთ ფსევდო-პოეტები გრძელი და დაუბანელი თმებით ნუ გამომეხმაურებით.
ვიქირავებ
ჯანსაღ, არამწეველ ფილტვებს ორი წლით, დღეში ერთი კოლოფი სიგარეტის ფასად, საექსპერიმენტოდ. დაინტერესებულები გამომეხმაურონ შემდეგ მისამართზე. აბასთუმანი, ტუბდისპანსერი.
ვხსნი
ჯადოებს და სეიფებს ერთნაირი წარმატებით და შესაბამისი ანაზღაურებით.
ვეძებ
სხვის ბალიშს თავის დასადებად. კისერში სუნთქვა ძილში ხელს არ მიშლის.