"ნინოს ვენაცვალე! ორმოცდაათი წელიწადია გასართობად აღარაფერს ვკითხულობ, ვაანალიზებ, ვინ როგორ სწერს, როგორი ხერხებით უსწორდება ამა თუ იმ მხატვრულ სიძნელეებს და შემთხვევათა უმრავლესობაში რომელიღაც ადგილზე კითხვას ვწყვეტ, რადგან "ყველაფერი ცხადია." შენი წიგნი ბოლომდე წავიკითხე. გამიკვირდა, რომ სიუჟეტი, რომელშიც სულ ადვილი იყო სანტიმენტალიზმში გადაჩეხვა, საოცრად მშრალ, მკაცრ ტონალობაშია გადაწყვეტილი და სახელდობრ ამით არის შესანიშნავი. ძალიან კარგი წიგნია, მიხარია ქართულ კაზმულ სიტყვიერებას, რომ კიდევ ერთი ნაღდი მწერალი მოევლინა. საშიშროება იყო უცხოური საკუთარი სახელებისა და ფრაზების გამოყენებას ზედმეტობაში არ გადაეყვანე, მაგრამ ეს ამოცანაც ყოვლად ზომიერად არის დაძლეული. გმადლობ სიამოვნებისათვის. ღმერთმა ხელი მოგიმართოს!" - ჭაბუა ამირეჯიბი. 2005 წელი