„ახლა კი გასულ წელს დაველოდოთ“ ფილიპ დიკის მერვე რომანია ქართულ ენაზე. თავბრუდამხვევი, ჩახლართული, მრავალფენიანი რომანის მოქმედება შორეულ მომავალში, 2055 წელს ხდება, როცა დედამიწა პოლიტიკურად რთულ მდგომარეობაშია და პლანეტებს შორის ომშია ჩაბმული. დედამიწა გალაქტიკათა საჭადრაკო დაფაზე პაიკის როლს ასრულებს და მისი მმართველის, ჯინო მოლინარის გონიერებაზეა დამოკიდებული, რამდენად დიდხანს შეძლებს არსებობას. რომანის მთავარი გმირი, ექიმი-ტრანსპლანტოლოგი, ერიკ სვიტსენტი, შემთხვევათა ჯაჭვის წყალობით, დამოკიდებული ხდება საომარ იარაღად ჩაფიქრებულ ნარკოტიკზე, რომელსაც შეუძლია, ადამიანი დროში ამოგზაუროს. ან იქნებ ეს მოგზაურობა მხოლოდ ილუზიაა?! წიგნის სიუჟეტი რთული, ჩახლართული და მოულოდნელია, ამოსუნთქვის საშუალებას არ იძლევა. დიკის მკითხველი აქაც ადვილად შეამჩნევს მის ნაწარმოებთა მთავარ თემებს - საყოველთაო გაუცხოებას, ნაღველს, სიყვარულს, მარტოობას, ნივთიერებაზე დამოკიდებულებას. წიგნი მძაფრად შეგვახსენებს, რომ უზენაესი ღირებულება სიცოცხლეა, ყოველგვარ ძალაუფლებაზე, დროსა და სივრცეზე აღმატებული.