შესავალი ამ წიგნის მთავარი სიკეთე ლიტერატურული სტილი ან სასარგებლო ინფორმაციის სიუხვე კი არ არის, არამედ ის, რომ სრულ სიმართლეს მოგვითხრობს. მის ფურცლებზე სინამდვილეში მომხდარი მოვლენებია ასახული. მე მხოლოდ ოდნავ შევალამაზე და საამისოდ არცთუ დიდი ჯაფა დამდგომია. ჯორჯი, ჰარისი და მონმორანსი პოეტური იდეალები როდი არიან: სამივე ხორციელი არსება გახლავთ, მეტადრე ჯორჯი, რომელიც დაახლოებით 12 სტოუნს(სტოუნი უდრის 6,35კგ-ს.) იწონის.
აზროვნების სიღრმითა და ადამიანის ბუნებაში წვდომის უნარით იქნებ სხვა თხზულებები სჯობდნენ ამ ნაწარმოებს; ორიგინალობითა და მოცულობითაც ეგებ სხვა წიგნები გაეჯიბრონ, მაგრამ თუ გამოუსწორებელ, უკურნებელ სიმართლეზე მიდგა საქმე, ამ მხრივ, მას დღემდე დასტამბული ვერა წიგნი ვერ შეედრება. გული მიგრძნობს, სხვა ღირსებებზე მეტად სწორედ ამის გამო დააფასებს სერიოზული მკითხველი, რომლის თვალშიც სიმართლე შემატებს, თუ შემატებს წონას ამ ჭკუის სასწავლებელ მოთხრობას.
ლონდონი,
1889 წლის აგვისტო
ჩუქება
