გუნდი, რომელსაც წარმატების შენარჩუნება შეუძლია
ეს არის პრინციპები, რომელთა დაცვას გუნდის პოტენციალის თითქმის სრული რეალიზება შეუძლია..
გუნდი უნდა იყოს ჯანსაღი, რომ, ერთი მხრივ, მიაღწიოს წარმატებას და, მეორე მხრივ, დროის გრძელვადიან პერიოდში შეინარჩუნოს იგი. ჯანსაღი გუნდი ის არის, სადაც ადამიანები ერთმანეთსა და ლიდერს ბოლომდე ენდობიან, სადაც თითოეულმა წევრმა ზუსტად იცის, რომ მისი ძალისხმევა და მონდომება სამართლიანად დაფასდება; სადაც არც ერთ წევრს არ ეშინია იყოს ზუსტად ისეთი, როგორიც არის, არ რცხვენია იყოს განსხვავებული, დაუშვას შეცდომები; სადაც ყველასთვის მთავარია, არ გაჩერდეს და მაქსიმალურად იაქტიუროს საერთო მიზნის სასარგებლოდ.
ჯანსაღი გუნდის შექმნისა და, შესაბამისად, მიღწეული წარმატების შენარჩუნების ერთადერთი გზა არსებობს, _ ლიდერმა და თითოეულმა წევრმა პატიოსნების, სამართლიანობისა და ურთიერთპატივისცემის პრინციპები უნდა დაიცვან. სწორედ ეს სამი პრინციპი განაპირობებს იმას, თუ რამდენად დიდი იქნება ნდობა გუნდის წევრებს შორის, რამდენად ადეკვატური იქნება სამართლიანი დაფასების მოლოდინი და რამდენად შეძლებენ ადამიანები, ბოლომდე გაიხსნან ყოველდღიურ ცხოვრებაში _ თავისი დადებითი და უარყოფითი, ძლიერი და სუსტი მხარეებით.
გუნდის წევრებს შორის და, პირველ რიგში, ლიდერსა და გუნდის წევრებს შორის ურთიერთნდობა ჯანსაღი გარემოს ჩამოყალიბების ამოსავალი წერტილია. პატიოსნებას ერთმანეთის მიმართ ნდობა საძირკველივით ეფუძნება, ამიტომ არის კრიტიკული ამ პრინციპის დაცვა გუნდის ძლიერებისთვის.
იქ, სადაც გრძელვადიან პერიოდში არაფერი იმალება, დიდი და პატარა ტყუილი არ არსებობს. სულ, ერთი შეხედვით უმნიშვნელო, უბოროტო, უწყინარმა ტყუილმაც კი შესაძლოა ურთიერთნდობა შეარყიოს. ნდობა, რომლის აშენებასაც დიდი ძალისხმევა სჭირდება, ერთი მცირე ტყუილით, ადვილი შესაძლებელია, ქვიშის სასახლესავით დაიშალოს. მახსოვს, ერთ-ერთ თათბირზე ერთმა ხელმძღვანელმა კლიენტს ყველას გასაგონად ტელეფონით უთხრა: _ აი, ამ წუთას აქ ვარ, ზუსტად შენს საკითხთან დაკავშირებით, ფინანსთა მინისტრის კაბინეტის კარს ვაღებო. შეხვედრას საკმაოდ ბევრი ხალხი ესწრებოდა, ყველას გადმოგვხედა, თვალიც ჩაგვიკრა და, ტელეფონი რომ გათიშა, გულიანადაც გავიცინეთ. დარწმუნებული ვარ, ყველა ჩვენგანისთვის (ვინც თათბირს ვესწრებოდით) ამ ხელმძღვანელის მიერ ნათქვამი ნებისმიერი ფრაზა (ტელეფონში გაჟღერებული თუ ისე) გაუფასურდა.