გურამ რჩეულიშვილის მხატვრული შემოქმედების ღრმად და მთლიანობაში გასააზრებლად მნიშვნელოვანია მისი დღიურები და პირადი ჩანაწერები. ამ შემოქმედების თავისებურებას, მის განსაკუთრებულ ხიბლს სწორედ დღიურისა და მხატვრული გამონაგონის ერთიანობა ქმნის. გურამ რჩეულიშვილის მწერლური ცხოვრება ოთხ წელიწადს მოიცავს – 1956 წლიდან 1960 წლამდე, მისი ამქვეყნიური ცხოვრების დასასრულამდე. ამავე პერიოდში იქმნებოდა დღიურები და ჩანაწერები, როგორც მწერლის სულიერი ბიოგრაფიის ლიტერატურული ანაბეჭდები.