"მკითხველმა ქეთი ბეროშვილის ახალი რომანი „ბედის ბორბალი“ მიიღო, სადაც ავტორი ჩვეული ხერხით ცდილობს ერთი რიგითი, უბრალო ადამიანების ცხოვრების ასახვით დაგვანახოს ჩვენი რეალობა, გვაგრძნობინოს, თუ რამდენად აუცილებელია მოყვასის სიყვარული, გვერდში დგომა და თანაგრძნობა. ლიტერატურა და საერთოდ მწერლობა ცხოვრების ანარეკლია. ერის სისუსტეს თუ ღირსებას მწერლის ხედვა შეუმცდარად აღნუსხავს და ფურცელზე გადატანილს საუკუნეებს ანდობს. ლიტერატურა, დიდ ილიას თუ დავესესხებით, „ხალხის ჭკუა, გონება, გრძნობა, ფიქრი, ჩვეულება და განათლების ხარისხია“. წინამდებარე რომანიც სწორედ იმის მცდელობაა, რომ გავიაზროთ, გავაანალიზოთ და სათანადო დასკვნები გამოვიტანოთ ცხოვრებისეული სირთულეების დასაძლევად და გადასალახად. იმედი მაქვს, მკითხველი გულითადად მიიღებს ქეთი ბეროშვილის ახალ რომანს და მას სათანადო ადგილს მიუჩენს." - მანანა გორგიშვილი.