ნაწილი I - ტომის ლიდერობის სისტემა
თავი 1
კორპორაციული ტომები
ყველა ორგანიზაცია სინამდვილეში პატარა ქალაქების ნაკრებია. თუ ასეთი ქალაქიდან ხართ, გაიხსენეთ მისი მცხოვრებნი. თუ არა და, როგორც დონ ჰენლი ამბობს, იფიქრეთ თითოეულ ჩვენგანში არსებულ პატარა ქალაქზე, სადაც ცხოვრობენ ბიზნესმენი, შერიფი და ხდება სკანდალები; ამ ქალაქში განიხილავენ, ვინ იქნება შემდეგი მერი, ვინ გადავა სხვაგან საცხოვრებლად, რა ფასი ექნება მარცვლეულს (ან ნავთობს, ან თუნდაც რამდენი იქნება საწყისი ხელფასი Wal-Mart-ში). აქ არის სკოლა, სადაც სწავლობს პოპულარული მოსწავლე, შერიფის შვილი, რომელიც მამამისის ქალაქგარეთ ყოფნისას, უქმეებზე, წვეულებას მართავს; აქ ცხოვრობენ ეკლესიის მრევლი, ბარის კლიენტები, მარტოხელები, წიგნის კლუბის წევრები, დაუძინებელი მტრები. არიან დაბადებით ლიდერებიც, რომლებსაც უწევთ თავის მართლება შერიფის სახლში გამართული წვეულებისა და ხალიჩაზე დაღვრილი ლუდის ლაქების გამო.
ხალხი ყველა ქალაქში სხვადასხვანაირია და მათი როლებიც არასოდეს არის იდენტური, მაგრამ მსგავსება ყოველთვის მეტია, ვიდრე განსხვავება. შესაბამისად, მეტაფორა ყოველთვის ამართლებს -დაწყებული ნებრასკისა და დამთავრებული ნიუ-იორკისა თუ კუალა-ლუმპურის კომპანიებით.
ამ პატარა ქალაქებს ჩვენ ტომებს ვუწოდებთ და მათი ჩამოყალიბება იმდენად ბუნებრივია, თითქოს ეს ჩვენი გენეტიკური კოდის ნაწილი იყოს. ტომები დაეხმარნენ ადამიანებს, გადაეტანათ უკანასკნელი გამყინვარების ხანა, შეექმნათ სასოფლო-სამეურნეო თემები, მოგვიანებით კი აეშენებინათ ქალაქები. ჩიტები ქმნიან გუნდს, თევზები -ქარავანს, ადამიანები კი, ტომებს.
ტომი არის 20-150 კაცისგან შემდგარი ჯგუფი. არსებობს მარტივი კრიტერიუმი -თუკი თქვენ ქუჩაში ადამიანის დანახვისას შეჩერდებით და მიესალმებით მას, ესე იგი, ის თქვე ნი ტომის ერთ-ერთი წევრია. მისი კონტაქტები, როგორც წესი, მოიძებნება თქვენს მობილურსა თუ საფოსტო ელექტრონულ წიგნაკში.
ციფრი "150" მომდინარეობს რობინ დანბარის კვლევიდან, რომლის პოპულარიზაციაც მალკოლმ გლადუელის წიგნის, "გარდატეხის მომენტის" დამსახურებაა. როდესაც ტომის წევრთა რაოდენობა ამ რიცხვს უახლოვდება, ტომი, ჩვეულებრივ, ორად იყოფა ხოლმე.
კორპორაციული ტომების ზოგიერთი ჩვენთვის ნაცნობი მაგალითია მსოფლიოს უმსხვილეს ფინანსური სერვისების კომპანიებში მომუშავე მაღალი პოტენციალის მქონე მენეჯერები; ამერიკის ერთ-ერთი ყველაზე რესპექტაბელური ჯანდაცვის ორგანიზაციის ექიმები, ექთანები და ადმინისტრატორები; გიგანტური მაღალტექნოლოგიური ფირმის კვლევისა და განვითარების განყოფილების თანამშრომლები; მთავარი ფარმაცევტული კომპანიის საოპერაციო აღმასრულებლები; სამხრეთ კალიფორნიის უნივერსიტეტის ბიზნესადმინისტრირების სამაგისტრო პროგრამის სტუდენტები.
ტომები კომპანიებში სამუშაოს შემსრულებლები არიან, ხშირად ძალზე დიდი მოცულობისაც, მაგრამ ეს არ არის მათი ჩამოყალიბების მიზეზი. ტომები ნებისმიერი მნიშვნელოვანი ადამიანური ძალისხმევის საფუძველია, მათ შორის, ლუკმაპურის შოვნისთვის გაწეული ძალისხმევისა. მათი გავლენა უფრო მნიშვნელოვანია, ვიდრე სხვა ჯგუფების, მთელი კომპანიებისა და ყველაზე პოპულარული აღმასრულებელი დირექტორებისაც კი. კომპანიებში სწორედ ტომი გადაწყვეტს, რამდენად წარმატებული თუ წარუმატებელი იქნება ახალი ლიდერი. ის განსაზღვრავს შესრულებული სამუშაოს მოცულობასა და ხარისხს.
ზოგიერთი ტომი წევრებისგან სრულყოფილებისკენ სწრა ფვას მოითხოვს და თავადაც მუდმივად ვითარდება, ზოგი კი აუცილებელ მინიმუმს სჯერდება. რა განაპირობებს ამ სხვაობას? -ტომის ლიდერები.
ტომის ლიდერები კონცენტრირებული არიან ტომის ჩამოყალიბებაზე, ან, უფრო ზუსტად, მისი კულტურის განვითარებაზე. წარმატების შემთხვევაში, ტომი ამ ადამიანებს ლიდერებად აღიარებს, თავს არ ზოგავს მათთვის, ზოგჯერ კერპადაც გაიხდის და დიდი ერთგულებით ქმნის ტომის წარმატების ისტორიას. სწორედ განყოფილებები და კომპანიები, რომლებსაც ტომის ლიდერები მართავენ, აწესებენ სამუშაოს შესრულების სტანდარტს თავიანთ ინდუსტრიაში -დაწყებული პროდუქტიულობით თუ მომგებიანობით და თანამშრომლების შენარჩუნებით დამთავრებული. ტომის ლიდერი ნამდვილი მაგნიტია ტალანტებისთვის. მას ჰყავს ხალხი, რომლებიც იმდენად არიან მოწადინებული, მისთვის იმუშაონ, რომ საჭიროების შემთხვევაში ხელფასის შემცირებაზეც თანახმა იქნებიან. იგი იმდენად სწრაფად ახერხებს მნიშვნელოვან კარიერულ ზრდას, ხალხი ხშირად ამბობს, რომ სწორედ ის იქნება შემდეგი აღმასრულებელი დირექტორი. თითქოს ის, რასაც ეს უკანასკნელი აკეთებს, სულაც არ საჭიროებს ძალისხმევას და ბევრს საგონებელში აგდებს, თუ როგორ ახერხებს ამ ყველაფერს. ბევრი ტომის ლიდერი ვერც კი გიპასუხებთ, რას აკეთებს ის განსხვავებულს, მაგრამ ამ წიგნის წაკითხვის შემდეგ თქვენ შეძლებთ ასეთი ადამიანების წარმატების საიდუმლოს ამოხსნასა და მის გამეორებას.
ისტორიიდან ტომის ლიდერის ბევრი ჩვენგანისთვის კარგად ნაცნობი მაგალითია ჯორჯ ვაშინგტონი. მის ერთ-ერთ დიდ დამსახურებად უნდა ჩაითვალოს 13 სხვადასხვა კოლონიის მცხოვრებთა ერთ საზოგადოებად გარდაქმნა. ეს მან ურთიერთდაკავშირებულ ტომებში საერთო იდენტურობის ჩამოყალიბებით შეძლო. ერთ-ერთი ამგვარი ტომი იყო ვირჯინიის საზოგადოების მდიდარი კლასი, სავარაუდოდ, 100 კაცზე ნაკლები, მეორე -კონტინენტური კონგრესი, საწყის ეტაპზე 55 დელეგატით, მესამე -კონტინენტური არმიის ოფიცერთა კლასი. თითოეულ შემთხვევაში ვაშინგტონი ჯგუფს მისი " ტომობის" აღიარებით აერთიანებდა, ამისთვის კი ჯგუფის წევრებს მათი საერთო ღირებულებების შესახებ ალაპარაკებდა, იქნებოდა ეს თავისუფლების დაფასება, ზიზღი ხელისუფალთა მიერ დაწესებული გადასახადებისადმი თუ ბრძოლაში გამარჯვების სურვილი. როდესაც მან თითოეული ტომისთვის საერთო