ხასიდობის, XVIII ს-ში წარმოშობილი იუდაიზმის განშტოების, მთელი გულისყური პიროვნებისკენ არის მიმართული. პიროვნება უნდა უღრმავდებოდეს საკუთარ თავს, მაგრამ თვითჩაღრმავება არ არის თვითმიზანი. მიზანი ყველგანმყოფი ღვთიური ნაპერწკლის ძიებაა საკუთარ თავში და სხვაში, და ყველგან. ეს წიგნი ხასიდური სწავლებების ქართულ ენაზე გადმოცემის ძალზე მნიშვნელოვანი და წარმატებული მცდელობაა. ზურაბ კიკნაძემ დიდი ძალისხმევა მიუძღვნა იმას, რომ იგი მთელი თავისი სისადავით, უშუალობითა და ფილოსოფიური სიღრმით ქართულად აემეტყველებინა. ამ ძალისხმევის შედეგად ჩვენ წინაშეა წიგნი, რომელიც ჩვენი, ადამიანური სამყაროს ერთ ძალზე მნიშვნელოვან განზომილებას გვამცნობს.