ოკეანეში დაკარგულ ერთ შორეულ კუნძულზე ყველასგან გამორჩეული და განსაკუთრებული გულღია შუშის ბაყაყი დიანე ცხოვრობდა. ასე იმიტომ ერქვა, რომ ნახევრად გამჭვირვალე იყო და მისი გულის ფეთქვას ყველა ნათლად დაინახავდა, თუკი ოდესმე მიაგნებდა. მისი პოვნა კი იოლი სულაც არ იყო, ძალიან ოსტატურად ინიღბებოდა და ამიტომ, ჯერ არავის ენახა. დიანე ხის ტოტებს აფარებდა თავს და მწვანე ფოთლებში იმალებოდა, იმის მაგივრად, რომ ჭაობში ეცხოვრა და ეყიყინა, სრულიად განსხვავებულ ხმას გამოსცემდა, რომელიც ჭრიჭინობელას ჭრიჭინს ჰგავდა. ერთადერთი, ვისთანაც გულითადი მეგობრობა აკავშირებდა, ალისფერი ნემსიყლაპია მეტსახელად დრაკონი იყო.