წიგნში იმერული ამბებია მოთხრობილი. საკითხავად საინტერესო, წასაკითხადაც იოლი. ამიტომაც ,,იმერული საკითხავიც“ ზედგამოჭრილი იქნებოდა სახელად. სურნელოვანი სტრიქონებია – ჩემი მამულისა და დედულის გამოზამთრებული მიწა – შეგოჯიჯებული, გამომშრალი, ზედვეა ამოკაწრული პწკარები და საქვეყნოდაა გამომზეურებული. გეოგრაფიული არეალი – ქვემო იმერეთის სოფლები: ხრესილი (ტყიბულის ზონა) და სკანდე (თერჯოლის ზონა). ისტორიულ წყაროებშივე ცნობილი ადგილები: ,,ხრესილის ბრძოლა“ და ,,სკანდის ციხე“. XX საუკუნის 80–იანი წლებიდან დღემდე თვალყურმიდევნებული, საქართველოს ქრონიკებში ჩაკარგული ყოფიერების კერძო ისტორიები. აქ ნოველებადაა დალაგებული რეალური ამბები საოჯახო ისტორიიდან. ბავშვობისდროინდელი მოგონებები – გაუწვრთნელი გონებით აღქმული, დავიწყების შიშით დამახსოვრებული, ემოციებით გამსუყებული, სასაცილოდ თუ სატირლად შემართული, სამხიარულოდ თუ სასევდოდ შეთხზული და ჩამოკალმული. არავინ და არაფერია გამოგონილი.