წინასიტყვაობა ამ და კიდევ 100-ზე მეტი წიგნის ავტორი მაიკლ ბონდი 1926 წელს ბერქშირის ქალაქ ნიუბურში დაიბადა. ბავშვობა ქალაქ რედინგში გაატარა. სკოლა თოთხმეტი წლისამ დაამთავრა და ჯერ ერთი წელი იურიდიულ ფირმაში იმუშავა, ხოლო შემდეგ "ბი-ბი-სი"-ში მოეწყო ინჟინრად. ომის დროს მსახურობდა როგორც სამეფო სამხედრო-საჰაერო ძალებში, ასევე არმიაში. სწორედ ამ პერიოდს უკავშირდება მისი პირველი მოთხრობა, რომელიც მან 1947 წელს, საბრძოლო დავალებით კაიროში ყოფნის დროს დაწერა. ჟურნალი London Opinion მოთხრობის გამოქვეყნებას დასთანხმდა და ამით მის მომავალ კარიერას ჩაუყარა საფუძველი. მაგრამ სანამ მთელ თავის დროს მწერლობას დაუთმობდა, ბონდი ბევრი ნაყოფიერი და ბედნიერი წელი "ბი-ბი-სი"-ში ტელეოპერატორად მუშაობდა.
ერთ თოვლიან შობის საღამოს მაიკლ ბონდს შთაგონება ეწვია, რამაც მისი ყველაზე ცნობილი ნაწარმოების შექმნას შეუწყო ხელი. იმ დღეს "სელფრიჯის" სავაჭრო ცენტრში თაროზე მარტოსული პატარა სათამაშო დათვი იპოვა. სწორედ ამან შთააგონა, დაეწერა "დათვი, სახელად პადინგტონი", რომელიც პირველად 1958 წელს დაიბეჭდა. ხალხმა სიყვარულით მიიღო ეს არაჩვეულებრივი პერსონაჟი და მას მერე სხვადასხვა ასაკის ახალგაზრდა მკითხველისთვის პადინგტონის მონაწილეობით კიდევ თოთხმეტი ნოველა, სხვადასხვა დასურათებული წიგნი და უამრავი პროექტი შეიქმნა.
საბავშვო ლიტერატურაში მნიშვნელოვანი წვლილის შეტანისთვის მაიკლი ორჯერ დაჯილდოვდა: 1997 წელს ბრიტანეთის იმპერიის ორდენი მიიღო, ხოლო 2002 წელს ლონდონის პორტრეტების ეროვნულ გალერეაში გამართულ საუკუნის საბავშვო ავტორების ღონისძიებაზე ჯილდო გადაეცა. ამჟამად მაიკლ ბონდი ლონდონში ცხოვრობს.
ჩუქება
