(თანა)ავტორისაგან
ამ კრებულში პირველადაა თავმოყრილი ჩვენს ჟურნალ-გაზეთებში 2011-2016 წლებში გამოქვეყნებული ჩემი ლექსები. ისინი დალაგებულია იმ „დროით-სივრცითი“ თანმიმდევრობით, როგორითაც გამოქვეყნდნენ.
მომეჩვენა, რომ ასეთი „ექსპერიმენტი“ შესაძლოა, საინტერესო გამოდგეს: თითოეული პუბლიკაცია ხომ - თავისთავად - „პატარა კრებულია“, სადაც ლექსების თანმიმდევრობა ისევე არ არის შემთხვევითი, როგორც - „დიდ კრებულში“; ანუ ყოველი პუბლიკაცია ერთი პატარა დასრულებული „სიცოცხლეა“ - პოეტისა და რედაქტორის ერთგვარი თანაავტორობით შექმნილი...
ამ „პატარა სიცოცხლეების“ ძეწკვიც არ უნდა იყოს მთლად შემთხვევითი...
და რადგან, ჩემი შეხედულებით, ეს ასეა, ამ ძეწკვს ლიტ. რედაქტორი არა ჰყავს... უფრო სწორედ - ჰყავს რამდენიმე თანაავტორი: დიდი მადლობა მათ! განსაკუთრებული მადლობა კი - ბრწყინვალე პოეტს ბატონ ვახტანგ ჯავახაძეს!