წინასიტყვაობა "ზაფხულს ზღვის პირნი და ვაკენი ცხელი
და არაგაუძლისი, მთის კერძონი გრილნი,
აგარაკოვანნი, კეთილნი, ზამთარ თბილი".
ვახუშტი ბაგრატიონი
საქართველო ოდითგანვე ცნობილი იყო სამკურნალო, გამაჯანსაღებელი, დასასვენებელი, საკურორტო ადგილებით: ამას ხელს უწყობდა საქართველოს ბუნებრივი მდებარეობა ზომიერ განედში. იმის გამო, რომ ტერიტორიის ჩრდილოეთი საზღვარი გადის კავკასიონის მაღალი ქედების მწვერვალებს, ის აბრკოლებს ჩრდილოეთიდან ცივი ჰაერის მასების თავისუფალ გავრცელებას; სამხრეთიდან მცირე კავკასიონის ქედები ხელს უშლის ცხელი ჰაერის მასების თავისუფალ გადაადგილებას, ხოლო დასავლეთით შავი ზღვის სანაპირო ზოლის თბილი და ნოტიო ჰავა ქმნის დასავლეთ საქართველოში ტენიან რბილ სუბტროპიკულს, ხოლო აღმოსავლეთით შედარებით მშრალ, რბილ კლიმატს. ასეთი ბუნებრივი პირობების გამო მრავალ ადგილას იქმნება საკურორტო კლიმატური პირობები, როგორც საზაფხულო, ისე საზამთრო დასვენებისათვის. მშვენიერი ბუნებრივი ლანდშაფტები, ფლორა და ფაუნა, მორაკრაკე ნაკადულები, ზღვის ტალღების სასიამოვნო დგაფუნი, მოჩუხჩუხე მდინარეებთან და ჩანჩქერებთან ერთად ქმნის საუკეთესო დასასვენებელ საკურორტო ადგილებს. სუბტროპიკული კლიმატი, ცივი და ცხელი მინერალური წყაროები, მტკნარი წყლის მნიშვნელოვანი მარაგი, წინაპართა დანატოვარი ხუროთმოძღვრული ძეგლები, ძვირფასი არქეოლოგიური მასალა, უნიკალური ნაკრძალები, ხელუხლებელი ველური ბუნების ნაწილები, ნაციონალური პარკები, ქართული ფოლკლორი, ტრადიციები, სტუმართმოყვარეობა ძველთაგანვე იზიდავდა ადამიანებს, როგორც საქართველოს,ისე მსოფლიოს სხვადასხვა კუთხიდან.
1990-იან წლებში განვითარებულმა მოვლენებმა (სსრკ დაშლა, სამოქალაქო ომი, სოციალური წყობილების ახალ ფორმაციაზე გადასვლა) უარყოფითი დაღი დაასვა ეროვნული მეურნეობის მრავალ დარგს, მათ შორის საკურორტო-რეკრეაციულ მეურნეობას. განუკითხაობის გამო გამოუსწორებელი ზარალი მიადგა ფლორას და ფაუნას. დაინგრა და განადგურდა მრავალი საკურორტო შენობა-ნაგებობა. ამას დაემატა 2008 წლის აგვისტოს ომი, რომელიც დაგვირგვინდა საქართველოს ძირძველი ტერიტორიის აფხაზეთისა და სამაჩაბლოს ანექსიით და რუსეთის მიერ მათი დამოუკიდებელ სახელმწიფოებად აღიარებით. რუსეთის ავიაციის მიერ დაბომბვის შედეგად ცეცხლი გაუჩნდა ბორჯომ-ხარაგაულის უნიკალური ნაციონალური პარკის ნაწილს და განადგურდა ზოგიერთი საკურორტო ტერიტორიის ფლორა და ფაუნა. მოხდა მშვიდობიანი მოსახლეობის გენოციდი. დაირღვა საერთაშორისო ნორმებით აღიარებული ადამიანთა უფლებები. საქართველოს მთავრობამ მოსახლეობასთან ერთად უნდა მოახერხოს საქართველოს ტერიტორიული მთლიანობის აღდგენა.
როგორც აღვნიშნეთ, საქართველოს საკურორტო მეურნეობის აღორძინებისა და განვითარებისათვის შესანიშნავი, ბუნებრივი პირობები არსებობს. ამ საქმიანობით თუ დაინტერესდება სახელმწიფო, ინვესტორები ან კერძო პირები, ეს გამოიწვევს ქვეყნის ეკონომიკურ აღმავლობას, დასაქმდება მრავალი ადამიანი, ხელი შეეწყობა რესპუბლიკაში სათანადო ინფრასტრუქტურის განვითარებას. წინამდებარე ნაშრომი წარმოდგენს ჩემი ლექციების კურსის მცირე ნაწილს და ვფიქრობ ნაშრომი დახმარებას გაუწევს და ზოგიერთ ინფორმაციას მიაწვდის კურორტების მშენებლობით, ქვეყნის ეკონომიკური განვითარებით, ადამიანთა ჯანმრთელობით დაინტერესებულ პირებს.
ცოტნე დადიანის სახელობის სოხუმის დამოუკიდებელი
უნივერსიტეტის უფროსი მასწავლებელი, ლექტორი
არასახელმწიფო ზოგასაგანმანათლებლო საჯარო სკოლა
"თე-ლო ეტალონი"-ის გეოგრაფიის მასწავლებელი
(მანანა) აფროდიტე კვაშილავა-ცეკვავა
ჩუქება
