ამ ნაწარმოებით, მე, როგორც ჩვეულებრივმა, რიგითმა მოქალაქემ, ჩემი პროტესტი გამოვთქვი გასული საუკუნის 90-იანი წლების მოვლენების მიმართ. ამასთან, მინდა ბოდიში მოვუხადო ყველა იმ გვარდიელს, თუ მხედრიონელს, რომლებიც პატრიოტული სულისკვეთებით გაერთიანდნენ ამ ორგანიზაციებში და შემდეგ უნებლიეთ იქნენ ჩათრეულნი ხელისუფლებას მოწყურებული რამდენიმე თანამდებობის პირის მიერ გაჩაღებულ ბრძოლაში ხალხის მიერ კანონიერად არჩეული პრეზიდენტის წინააღმდეგ. პატრიოტი მებრძოლების გვერდით, ამ ორგანიზაციებში სპეციალურად ციხიდან გამოშვებული ყველანაირი ქურდის, რეციდივისტის, გარეწარის გაერთიანება და მათი შეიარაღება მოხდა. ამან ხელ-ფეხი გაუხსნა ბანდიტებს და მათი ქმედება უკონტროლო გახდა. რომანში აღწერილი ამბების უმეტესობა რეალურ ფაქტებს ემყარება, რომლებიც ჩემს გარშემო, ზოგი კი, პირადად ჩემს ცხოვრებაში მოხდა. სოფელი პირობითად ავიღე, პერსონაჟები გამოგონილია, თუმცა მსჯელობენ და საუბრობენ ისე, როგორც ჩემს გვერდით მცხოვრები უამრავი მოქალაქე იმ პერიოდში. აფხაზეთის ომის მოვლენების აღწერისას ვიხელმძღვანელე მაშინდელი პრესით და დოკუმენტური მასალით.