„ისევ საკუთარ თავში უნდა ჩავბრუნდე“, - ამ სიტყვებს გივი ალხაზიშვილის რომანის „ამოდის თუ ჩადის მზე?!“ პერსონაჟი ამბობს და როგორც ფორმულაში, ისე მოაქცევს საკუთარი ცხოვრების წესსა და კანონს. „საკუთარ თავში ჩაბრუნებისას“ მოხილული სანახების ფურცელზე გადმოტანაა მთელი რომანი, რომელიც მთლიანად ინტროვერსულია. მწერლის ყურადღება გადატანილია ადამიანის შინაგან სამყაროზე, ამიტომაც შემოქმედებითი ენერგიის კონცენტრაციაც ერთ პერსონაჟში ხდება და მოზაიკურად ასახავს სიყვარულის დაუვიწყარ ისტორიას.