რომანის სრული სახელია „მადამ ბოვარი – პროვინციული ზნე–ჩვეულებები“. მეორე სათაური მკითხველს განუმარტავს ნაწარმოების არსს. რომანში ნაჩვენებია, თუ როგორ უხუთავს ადამიანს სულს დამყაყებული პროვინციული ყოფა. ემა ბოვარი მონასტრის დახშულ ატმოსფეროში აღიზარდა. აქ კითხულობდა რომანტიკულ ნაწარმოებებს, რომლებშიც დახატული იყო სიამითა და ბედნიერებით აღსავსე ცხოვრება. ემამ ვერ ჰპოვა იდეალი ვერც მეუღლეში და ვერც თაყვანისმცემლებში. მისმა ცხოვრებამ რთული ხასიათი მიიღო, სადაც ზნეობრივი და უზნეო საქციელი გადაეხლართა ერთმანეთს.