ქალი რომ "სუსტი სქესი" არ არის, ამას მრავალი მწერლის, მუსიკოსის თუ ფილოსოფოსის გარდა, ქართული ფოლკლორიც ამტკიცებს, რომელსაც თავისი ქალი "არსენა" ჰყავს, ეს ანა ბაჯია, რეალური პიროვნება, რომელიც თბილისში ცხოვრობდა და ისეთი ღონიერი იყო, დათვსაც ეჭიდებოდა. ანა თავის ძალას სამართლის დასამყარებლად იყენებდა, ებრძოდა მებატონეებს, გადასახადების ამკრეფებს, რომლებიც უბრალო ხალხს ავიწროებდნენ... ანა ბაჯიზე მრავალი საინტერესო თქმულებაა, ლიტერატურული ვერსია კი ცნობილ თბილისელ აშუღს - იეთიმ გურჯს ეკუთვნის, რომელიც ძალიან საინტერესოდ აღწერს ამ განსაკუთრებულ ქალს.