ამ კრებულში შესული ლექსები გამოირჩევა მრავალფეროვანი რიტმით, ამით იგი ჯაზურ კომპოზიციასაც წააგავს, ყოველ შემთხვევაში მისი ლექსების უმრავლესობა ასეა. ამავდროულად გივი ალხაზიშვილი ექსპერიმენტებსაც მიმართავს, პარალელურად მუშაობს კონვენციურ, ტრადიციულ სალექსო ფორმებში, სადაც გამოხატვის განსხვავბულ სტილისტიკას ამკვიდრებს. ზოგ შემთხვევაში ეს ხდება უფრო ლირიული შეგრძნებების გასაძლიერებლად, ზოგ შემთხვევაში კი უფრო ირონიულ-პაროდიული კონოტაციებითაა გამოწვეული. ამ წიგნში შეხვდებით ვერლიბრს, ვერბლანს და ტრანსფორმირებულ კონვენციურ ლექსებსაც, სადაც გაისმის ჯაზური კომპოზიციების ფრაგმენტები.