მართალია, წიგნი „შოთა რუსთაველის ვინაობის კონტურები“ პატარა მოცულობისაა, მაგრამ იგი შედეგია საკმაოდ დიდი შრომისა. რამდენიმე მკვლევარის წიგნების გაცნობის შედეგად, ცალსახად დავეყრდენი პავლე ინგოროყვას კვლევებს. ამჟამად ჩემი ერთადერთი და მთავარი მიზანი იყო, დამეზუსტებინა შოთას ვინაობა, ვინ იყო იგი და საიდან მოვიდა. ცხადია, მკვლევარები შოთა რუსთაველის ვინაობას ძერწავენ პოემა „ვეფხისტყაოსნის“ ტექსტებიდან იმდენად, რამდენადაც არავითარი ხელმოსაკიდი და დამადასტურებელი მასალა არ არსებობს შოთას ვინაობის შესახებ. სწორედ ესაა მიზეზი იმისა, რომ ზოგი შოთას მოიხსენიებს მე-16 საუკუნის მელექსედ და ზოგსაც მიაჩნია, რომ „ვეფხისტყაოსნის“ ავტორი შოთა კი არა, სხვა არის. მწამს პავლე ინგოროყვას კვლევები შოთა რუსთაველის შესახებ და სწორედ ეს აზრია გატარებული ჩემს პატარა წიგნში „შოთა რუსთაველის ვინაობის კონტურები“.