კაცი, რომელმაც მთვარე გაყიდა

კაცი, რომელმაც მთვარე გაყიდა - 


თავი პირველი – რწმენა არ უნდა დაკარგო!

ჯორჯ სტრონგი თავისი პარტნიორის ამ განცხადებას ეჭვიანი ფრუტუნით გამოეხმაურა.

– დელოს, აღარ მოგბეზრდა? უკვე წლებია, ამ ფირფიტას ატრიალებ, – თქვა მან, – საეჭვოა, ოდესმე დადგეს ის დრო, როცა ადამიანი მთვარეზე წავა. ყოველ შემთხვევაში, მე და შენ ამას ნამდვილად ვერ მოვესწრებით. ეს საქმე ჩვენი თაობისთვის ისევეა დაკარგული, როგორც ენერგიის სატელიტი.

– თუ აქ ვისხდებით და ტრაკებს გავისქელებთ, ნამდვილად ეგრე იქნება, – ჩაიბუზღუნა დ. დ. ჰარიმანმა, – თუ ვიმოქმედებთ, ყველაფერი გამოვა.

– როგორ უნდა ვიმოქმედოთ? ან რატომ?

– რატომ? ეს რა მესმის! ჯორჯ, ნუთუ პროცენტების და დივიდენდების გარდა თავში არაფერი გიტრიალებს? ნუთუ ზაფხულის ერთი მშვენიერი საღამო მაინც არ გაგიტარებია გოგოსთან ერთად მთვარის ცქერაში... ნუთუ არ გაინტერესებს, იქ რა ხდება?

– კი, ერთხელ მართლაც მქონდა ასეთი შემთხვევა. მახსოვს, საშინლად გავცივდი.

ჰარიმანმა გულში უზენაესს უსაყვედურა, ფილისტერთა ხელში რად ჩამაგდეო, შემდეგ პარტნიორს მიუბრუნდა:

– მე შემიძლია გითხრა, რატომ უნდა ვიმოქმედოთ, შემიძლია ნამდვილი მიზეზები გითხრა, მაგრამ შენ ამას ვერ გაიგებ. ეს საკითხი მხოლოდ ფულთან მიმართებაში გაინტერესებს; შენთვის მთავარი „ჰარიმანი და სტრონგის“ და „ჰარიმანის კომპანიის“ მოგებაა. გინდა გაიგო, როგორ მივიღებთ მოგებას, ხომ მართალი ვარ?

– მართალი ხარ, – მიუგო სტრონგმა, – ოღონდ იცოდე, ტურისტულ ვაჭრობასა და მთვარის საარაკო განძეულობაზე ზღაპრების მოსმენა აღარ მინდა.

– საქმე ისაა, რომ ჩვენ სრულიად ახლებური ტიპის საწარმოზე ვსაუბრობთ, შენ კი რიცხვებს წინასწარ მთხოვ. ამის გათვლა შეუძლებელია. ეს იგივეა, ძმებ რაითებს რომ მოსთხოვო, დაადგინონ რამდენ ფულს იშოვის კერტის-რაითის კორპორაცია თვითმფრინავების წარმოებით. იმასაც შეგახსენებ, რომ შენ ჩვენი სახლების ბიზნესსაც ეწინააღმდეგებოდი. შენი რომ გაგეტანა, ახლაც კანზას-სითიში ვისხდებოდით და ძროხების საძოვრებს გავაქირავებდით. 

პასუხად სტრონგმა მხრები აიჩეჩა.

– შეგიძლია „ახალი სამყაროს სახლების“ შემოსავლები შემახსენო? – ჰკითხა ჰარიმანმა.

სტრონგი წუთით ჩაფიქრდა, თვლა და ანგარიში მისი სფერო იყო.

– ჰმ... გადასახადების გადახდის შემდეგ, გასული ფინანსური წლის ბოლოს დარჩა 172.946.004 დოლარი. თუ შემდგომ პერიოდსაც ვიანგარიშებთ...

– არ გინდა. მითხარი, ჩვენმა წილმა რამდენი შეადგინა?

– ჰო... ესე იგი, ჩვენმა პარტნიორობამ ამავე პერიოდში „ახალი სამყაროს სახლებისგან“ სარგებლად მიიღო 13.010.437 დოლარი, თუმცა აქ არ ვთვლი იმ ნაწილს, რომელიც პირადად შენ მიიღე და შემდეგ მომყიდე, აგრეთვე არც შემდგომ ინდივიდუალურ დაბეგვრას. დელოს, ეს ორმაგი დაბეგვრა უნდა შეწყდეს! ღმერთმა უწყის, საით მიექანება ქვეყანა ამგვარი...

– ჰო, კარგი, კარგი! ახლა მითხარი, რამდენი მივიღეთ „ციური გადაზიდვებისგან“? 

სტრონგმა მოახსენა.

– ხომ ხედავ? არადა, რამდენი დავიდარაბა დამჭირდა, რომ საკონტროლო პაკეტის საყიდლად ორიოდ გროში გაგემეტებინა. ამტკიცებდი, რაკეტები მალე გადავა მოდიდანო.

– უბრალოდ გაგვიმართლა, – შეედავა სტრონგი, – წინასწარ ვერავინ განსაზღვრავდა, რომ ავსტრალიაში ამდენ ურანს აღმოაჩენდნენ, ამის გარეშე კი „ციური გადაზიდვები“ მშრალზე დაგვტოვებდა. სხვათა შორის, „ახალი სამყაროს სახლებიც“ არ გაამართლებდა, გზა-ქალაქები რომ არ გამოჩენილიყო. სწორედ მაგან გვიხსნა ადგილობრივი სამშენებლო კოდექსების კლანჭებისგან. 

– სისულელეა ეს ყველაფერი. სწრაფი ტრანსპორტი წამგებიანი ბიზნესი არასოდეს ყოფილა. „ახალ სამყაროს“ რაც შეეხება, თუ ათ მილიონ ოჯახს ახალი სახლები სჭირდება და შენ იაფად შესთავაზებ, აუცილებლად იყიდიან. ვერანაირი სამშენებლო კოდექსები ამას ვერ შეაჩერებს. ასე რომ, წარმატება გარანტირებული გვქონდა. აბა, დაფიქრდი, ჯორჯ, რომელი წამოწყებები გამოდგა სარფიანი? ფაქტობრივად, ყველა ჩემი გიჟური იდეის წყალობით ბლომად ფული ვიშოვეთ, ასე არ არის? მეორე მხრივ, სწორედ მაშინ ვაგებდით, როდესაც ფსონს კონსერვატიულ, „სანდო“ ინვესტიციებზე ჩამოვდიოდით.

– სულაც არა, ფული კონსერვატიულებიდანაც შემოგვივიდა, – გააპროტესტა სტრონგმა.

– შენი იახტისთვის ეგ ფული ნაღდად არ გეყოფოდა. ყველა ჩემმა რისკიანმა სქემამ გაამართლა, აღიარე, ჯორჯ. თუნდაც „ანდების განვითარების კომპანია“ გაიხსენე, ან ინტეგრაციული პანტოგრაფის პატენტი...

– მაგ შენმა სქემებმა სისხლი გამიშრო, – ჩაიბუზღუნა სტრონგმა.

– ამიტომაც ვართ პარტნიორები. მე ველური გეგმებით გამარაგებ, შენ კი ათვინიერებ მათ და საჭირო მიმართულებას აძლევ. ამჯერად მთვარეზე წავალთ, მე ორგანიზებას გავუკეთებ, შენ კი იმუშავებ, რომ მოგება მივიღოთ. 

– მრავლობით რიცხვში ნუ ლაპარაკობ, მე მთვარეზე წასვლას არ ვაპირებ.

– მე კი ვაპირებ.

– ჯანდაბა, დელოს! მართალია, შენი ინტუიციის წყალობით გავმდიდრდით, მაგრამ თუ ასე გააგრძელებ, ერთხელაც იქნება და, თავს წააგებ.

– გეყოფა, ჯორჯ! მე მთვარეზე წასვლას ვაპირებ და თუ ამაში მხარს არ მიჭერ, სჯობს შევწყვიტოთ პარტნიორობა და ამ საქმეს მარტო მივხედავ.