აზრები ხელოვნების ურჩეულესი ქმნილებანი, ხაზების დახვეწილობა, სრულქმნილი ენის სინატიფისა და ჰარმონიულობის გემოს ხილვით მონიჭებული სიამოვნება, ზოგიერთი მათემატიკური ორაზროვნების სიტკბოება, სიზუსტე, რომელსაც სულის იდუმალ სიღრმეთა ჩხრეკით შეიძლება მიაღწიოს კაცმა, – ყველაფერი ეს რამდენიმე პირის კერძო საქმეა. წაართვით მათ ისინი, – ვინ წარმოიდგენს უფრო დიდ დანაკარგს?
*
მშვენიერი ქმნილებანი მათივე ფორმის ასულნი არიან; ფორმისა, რომელიც მათზე ადრე იბადება.
*
ზოგიერთი ნაწარმოები თავისი პუბლიკის მიერ არის შექმნილი, ზოგიერთი კი თვითონვე ჰქმნის თავის პუბლიკას.
პირველნი აკმაყოფილებენ საშუალო ბუნებრივი გრძნობელობის მოთხოვნილებებს, მეორენი კი თვითონვე ჰქმნიან ხელოვნურ მოთხოვნილებებს და, ამავე დროს, კიდევაც აკმაყოფილებენ მათ.
*
არაფერია უფრო ორიგინალური, უფრო ჩვენეული, ვიდრე ის, რომ სხვებისგან და სხვებით ვსაზრდოობთ. მაგრამ საჭიროა მათი მონელება. ლომი კარგად ათვისებული და ასიმილირებული ვერძისგან არის შექმნილი.
*
შიში სისულელისა და ძრწოლა ბანალურის წინაშე; გეშინოდეს იმისა, რომ თითით საჩვენებელი შეიქმნე და იმისაც, რომ ვერავინ შეგნიშნოს; – ორი უფსკრული.
*
გემოვნება, რომელიც მხოლოდ სიახლით ტკბება და სიახლეს უწევს ანგარიშს, კრიტიკული სულის დეგენერაციას მოწმობს, რადგან არაფერია უფრო ადვილი, ვიდრე ნაწარმოების სიახლეზე მსჯელობა.
*
ჩვენი მოწაფეები და მიმდევრები ათასწილ უფრო მეტს გვასწავლიდნენ, ვიდრე ჩვენი მასწავლებლები, სიკვდილი რომ გვაცლიდეს მათი ქმნილებების ხილვას.
*
სინტაქსი სულის უნარია.
წიგნები
თითქმის ყველა წიგნი, რომელსაც ვაფასებ და უკლებლივ ყველა წიგნი, რომელიც რამეში გამომდგომია, საკმაოდ ძნელი საკითხავია.
*
აზრს შეუძლია მოსწყდეს მათ, მაგრამ არ შეუძლია ზერელედ, თვალის ერთი გადავლებით გადაიკითხოს ისინი.
ზოგი მე გამომადგა მათი სიძნელის მიუხედავად; ზოგი კი – სწორედ მათი სიძნელის გამო.
თანამედროვე მწერლის შესახებ:
მისი აქციდენტები განსაცვიფრებელია, რასაც ვერ ვიტყვით მისი სუბსტანციის მიმართ.
*
პოეტური იდეა ის იდეაა, რომელიც, პროზით გადმოცემული, კვლავ ლექსად გარდათქმას მოითხოვს.
*
სრულყოფილება თავდაცვის იარაღია. აღმართე სრულყოფილება შენსა და სხვას შორის; შენსა და შენსავე თავს შორის.
*
მსუბუქი უნდა იყო, როგორც ჩიტი და არა როგორც ბუმბული.
*
კაცი, რომელიც მუშაკობს, ასე ესიტყვება საკუთარ თავს: მე მინდა ვიყო უფრო ძლიერი, უფრო გონიერი, უფრო ბედნიერი – ვიდრე – მე.
*
დიდება რომ გიყვარდეს, ძალზე დიდი წარმოდგენისა უნდა იყო ადამიანებზე: უნდა გჯეროდეს, უნდა გწამდეს მათი.
*
კაცი, რომელსაც ერთხელაც არ უცდია დამსგავსებოდა ღმერთს, უფრო პატარაა, ვიდრე კაცი.
*
კაცი, რომელიც თქვენ გიტევთ, არის კაცი, რომელიც გულს იოხებს მხოლოდ.
წარმოიდგინეთ ამ კაცის სახე, როცა იგი მის წინ გაშლილ სუფთა ქაღალდზე თქვენს სალანძღავ სიტყვას პოულობს. ის შლის დაწერილს და კიდევ უფრო უკეთესი სიტყვით ცვლის მას.
ნურასოდეს ჩამოხსნით ამ სურათს თქვენი სულის კედლიდან.
*
თუ ჩემი მე ზიზღის ღირსია, მაშინ პრინციპი – გიყვარდეს მოყვასი შენი, ვითარცა თავი შენი – სასტიკ ირონიად იქცევა.
*
ბოლოს და ბოლოს, ეს უბადრუკი სიცოცხლე არა ღირს იმად, რომ ჩვენს ჭეშმარიტ რაობას მსხვერპლად ვწირავდეთ იმას, რადაც გვსურს ვჩანდეთ, მით უმეტეს, როდესაც ვიცით, თუ ვის თვალში ან რა თვალში უნდა ვჩანდეთ.
ბანალური საუბარი
ბანალურია საუბარი, როცა ერთი თანამოსაუბრის სიტყვებს თავისუფლად აგრძელებს მეორე და ეს სიტყვები ერთიმეორეს ენაცვლებიან.
ამ სიტყვებს მხოლოდ ხმის ტემბრით თუ გაარჩევს კაცი. ხმის ტემბრით შემიძლია უცნობი ვიცნო. ის იშვიათად მატყუებს მე.
ხმა მე მიმჟღავნებს სულის ზოგიერთ თვისებას. ეს ძალიან ჰგავს ადამიანთა ამოცნობას მათი ხელწერის მიხედვით, რასაც თავიანთ პრაქტიკაში მიმართავენ გრაფოლოგები. მაგრამ ჩემი ფონოლოგია ნაკლებ ობიექტურია.
*
ამა თუ იმ არსების ჭეშმარიტი საიდუმლო მისთვის უფრო საიდუმლოა, ვიდრე სხვისთვის.
*
ჭკვიანი კაცის საიდუმლო უფრო ნაკლებ საიდუმლოა, ვიდრე სულელის.
*
ნათელი სული გასაგებს ხდის მას, რაც თვით მისთვის გაუგებარია.
*
აუხსნელი პატარა ფაქტები ყოველთვის შეიცავენ რაღაც
ისეთს, რასაც შეუძლია თავდაყირა დააყენოს დიდი ფაქტების ნებისმიერი ინტერპრეტაცია.
სიღრმე
ყოველი სიღრმე, რომელსაც ამა თუ იმ მდგომარეობის თვისებად ვსახავთ, სხვა არა არის რა, თუ არა ამ მდგომარეობის დაშორება ნორმალური მდგომარეობიდან და არა მისი მიახლოება უაღრესად მნიშვნელოვანსა და დაფარულთან.
სიღრმე
ღრმა იდეა ის იდეაა, რომელიც მთლიანად გარდაქმნის მოცემულ სიტუაციას თუ კითხვას.
სხვაგვარად, საქმე ეხება მხოლოდ რეზონანსის ეფექტს და ჩვენ ლიტერატურაში ვართ.
*
უმრავლესობა თავისი აზროვნების განვითარების საწყის
ჩუქება
