შესავალი ამ გზამკვლევის ერთ-ერთი სასურველი სათური, შესაძლოა, ყოფილიყო - “ როგორ გავხდეთ საუკეთესო ონლაინ ჟურნალისტი ” , ან “ როგორ შევქმნათ კარგი ახალი ამბების ვებგვერდი ” , ან “ როგორ დავწეროთ ახალი ამბავი, რომელსაც ყველა წაიკითხავს ” , ან კიდევ “ როგორ ვიაქტიუროთ ჟურნალისტებმა სოციალურ მედიაში ისე, რომ შევინარჩუნოთ რეპუტაცია ” .
ესენი საუკეთესო სათაურები იქნებოდა გუგლისთვის, მაგრამ ჩვენ ეს არ ვიცით. ასევე, გვეეჭვება, რომ ვინმეს ასეთი ზუსტი ფორმულები ჰქონდეს.
ცხადია, არ ვფიქრობთ, რომ ჟურნალისტიკა მოკვდა, ან მოკვდება. ის, უბრალოდ, იცვლება, უმჯობესდება. ციფრული რევოლუციის პირობებში საუკეთესო გზა ჟურნალისტიკის გასაგებად არის დაკვირვება იმაზე, თუ რა იცვლება, როგორ იცვლება, ასევე, ჩვენი და სხვისი წარმატებული და წარუმატებელი ექსპერიმენტები.
ამიტომაც ეს გზამკვლევი ჩვენი და სხვების დაკვირვებებისა და პერსონალური გამოცდილების ნაზავია, რაც სტუდენტებისთვის, შეიძლება, მათი დაკვირვებების, ძიებისა და ექსპერიმენტების ინსპირაცია გახდეს.
იმის მიუხედავად, რომ ზუსტი ფორმულები არ არსებობს, ჩვენ გვგონია, რომ სამი მნიშვნელოვანი საკითხის ცოდნა ეხმარება ჟურნალისტს დაიწყოს ფიქრი, როგორც ონლაინ რეპორტიორმა:
CMS [კონტენტის მენეჯმენტის სისტემა]
ინტერნეტსერვისები/პლატფორმების გამოყენების უნარი
სტატისტიკა - ონლაინ მომხმარებლების ქცევაზე დაკვირვება
ამიტომაც გზამკვლევის დიდი ნაწილი სწორედ მათი გამოყენების ინსტრუქციებს ეთმობა. თუმცა ყველაფერი ისე სწრაფად იცვლება, რომ ყველა ეს სერვისი და დაკვირვების შედეგი რამდენიმე წელში, ან უფრო ადრეც, შეიძლება, სრულიად გამოუსადეგარი გახდეს.
მთავარია, ვისწავლოთ, როგორ აღმოვაჩინოთ ახალ-ახალი სერვისები, დავაკვირდეთ ახალი ამბების ვებგვერდებს და ვატაროთ ექსპერიმენტები. მოგვწერეთ, გაგვიზიარეთ თქვენი ექსპერიმენტები.
ნესტან ცეცხლაძე, კონსტანტინ სტალინსკი