ზამთარი პოლი მიდიოდა და შიგნიდან რაღაც ახრჩობდა...
თუმცა დედასთან უდარდელად აგრძელებდა ლაპარაკს.
თვითონ არასოდეს გამოუტყდებოდა, როგორ ტანჯავდა ასეთი რამეები.
დედა კი ამას მხოლოდ ნაწილობრივ ხვდებოდა."
დ. ჰ. ლორენსი "ვაჟები და საყვარლები"
იანვარი
ხუთშაბათი, 1 იანვარი
ბანკის უქმე1(ბანკის უქმე - გაერთიანებულ სამეფოსა და ირლანდიაში: ამ დღეს ბანკები დაკეტილია და მოსახლეობის უმრავლესობას აქვს უფლება დაისვენოს, ან, თუკი იმუშავებს, მიიღოს დამატებითი ანაზღაურება, კონტრაქტისდა მიხედვით. ) ინგლისში, ირლანდიაში, შოტლანდიასა და უელსში
ახალ წელს თავს პირობა მივეცი, რომ ამიერიდან:
1. ქუჩაზე გადავიყვან ბრმებს.
2. აღარ დავაგდებ ძირს შარვალს.
3. კონვერტებში ჩავაწყობ ფირფიტებს.
4. არ დავიწყებ მოწევას.
5. აღარ ვიწვალებ მუწუკებს.
6. არ ვაწვალებ ძაღლს.
7. აუცილებლად დავეხმარები ღარიბებსა და უბირებს.
8. ახლოსაც არ გავეკარები სპირტიან სასმელებს. ესეც დავიფიცე მას შემდეგ, რაც წუხელ ქვემოდან საზიზღარი ხმები ამოდიოდა.
მამამ ძაღლი შერი-ბრენდით დაათრო. ეს რომ ცხოველთა დაცვის სამეფო საზოგადოებამ გაუგოს, მაგარი მოხვდება. რვა დღეა, შობას აქეთ, რაც დედას მბზინავი ლურექსის მწვანე წინსაფარი ვაჩუქე, მაგრამ ერთხელაც არ გაუკეთებია! ჰოდა, ავდგები და გაისად შობას აბაზანის სახეხ სითხეს ვაჩუქებ!
არა, ჩემი იღბალი რა ვთქვი, რა! მაინცდამაინც ახალ წელს არ ამომიხტა მუწუკი და თანაც ნიკაპზე?!
პარასკევი, 2 იანვარი
ბანკის უქმე შოტლანდიაში. სავსე მთვარე
საშინლადა ვარ. ეს იმიტომ, რომ წუხელ დედამ არ დამაძინა. ღამის ორ საათამდე ჩემი საძინებლის კართან ფრენკ სინატრას "My Way"-ის მღეროდა. რა დავაშავე?! ეს რა დედა მყავს! გაგონილა?! აი, გამილოთდებიან მშობლები და გაისად ბავშვთა სახლში მომიწევს ახალი წლის შეხვედრა.
ძაღლმა მამაჩემს შერი-ბრენდისთვის სამაგიერო გადაუხადა. თაროდან გემის მაკეტი ჩამოუგდო და გაუტეხა. მერე ნამტვრევები ფეხებში შეესო; თათზე ზამბარა წამოეცვა და ასე დარბოდა მთელი დღე ეზოში. მამა იდგა და გაიძახოდა: "არ დამღუპა?! არ ჩამიყარა სამი თვის შრომა წყალში?!"
მუწუკი კიდე იზრდება და იზრდება! ესეც სულ დედას ბრალია - არ გაუგონია, ვიტამინები რომ არსებობს!
შაბათი, 3 იანვარი
ეს უძილობა ბოლოს მომიღებს! წუხელ მამამ ძაღლი სახლიდან გააგდო, ის კიდე იდგა და მთელი ღამე ჩემი ფანჯრის ქვეშ ყეფდა. არ შეიძლებოდა, სხვაგან ეყეფა?! რა დავაშავე?!
მამამ ფანჯარა გამოაღო და ძაღლს აგინა. პოლიციას არ გაუგია, თორემ ვინ აპატიებდა საზოგადოებრივი თავშეყრის ადგილას გინებას?
არა, ეს მუწუკი კი არა, ნამდვილი ფურუნკულია! რა დავაშავე, რა! თან რაღა ყველაზე გამოსაჩენ ადგილზე ამომივიდა! დედას ვუთხარი, დღეს C ვიტამინი არ დამილევია-მეთქი. წარბიც არ შესტოკებია, ისე მიპასუხა, წაბრძანდი და ფორთოხალი იყიდეო. ეგრე იცის ხოლმე.
ჩემი ნაჩუქარი ლურექსის წინსაფარი ჯერაც არ აუფარებია.
როდის დამთავრდება არდადეგები? სკოლაში მინდა!
კვირა, 4 იანვარი
მეორე კვირა შობის შემდეგ
სულ არ მიკვირს, რომ მამას გრიპი შეეყარა. კიდე კარგადა ვართ! ნორმალური სადილი ჩვენ არა გვაქვს და ვახშამი! დედა თავსხმა წვიმაში მაღაზიაში ჩ ვიტამინის საყიდლად გაიქცა; რაღა დროსია? ან სურავანდი როგორ არ დაგვემართა აქამდე? დედა მეუბნება, ნიკაპზე არაფერი გეტყობაო; ეგეც არასრულფასოვანი კვების ბრალია.
ძაღლი გაიპარა. მაშ რას იზამდა, დედას ჭიშკარი ღია დარჩენია. ფირსაკრავის ღილაკი გამიტყდა. ოჯახში არ იციან და ჯერ ვერც გაიგებენ. ფირსაკრავს მარტო მე და მამა ვრთავთ. ახლა წევს და, თუ გამიმართლა, ვერც ადგება კარგა ხანს. მთლად ეგრე უიღბლოც არა ვარ!
დედა წინსაფარს არ იკეთებს.
ორშაბათი, 5 იანვარი
ძაღლი ჯერ არ გამოჩენილა და სახლშიც სიმშვიდეა. დედამ პოლიციაში დარეკა და სთხოვა, ძაღლი მომიძებნეთო. ახლა არც ისეთი მახინჯია, როგორც აღუწერა: თვალებზე ჩამოფხატული აბურძგნილი ბანჯგვლით და ეგეთებით. გავაფრთხილე, პოლიცია არ მოაცდინო-მეთქი, მაგრამ დამიჯერა? აბა, სად სცალია პოლიციას ძაღლების სადევნად?! მაშ მკვლელები ვიღამ დაიჭიროს?! ახი არ იქნება ახლა მაგაზე, პოლიციის მოუცლელობის გამო სადმე ბნელ კუთხეში დანა გაუყარონ?
მამაჩემი ისევ ლოგინში ნებივრობს. თვითონ რომ ჰკითხოთ, ავად არის, მაგრამ მე რას გამომაპარებს? შევამჩნიე - ჩუმ-ჩუმად სიგარეტს ეწევა!
საშობაოდ ნაიჯელი საზღვარგარეთ ისვენებდა. დღეს შემომიარა; მაგარი გაშავებულია. ვერ აიტანს ეგ ინგლისის სიცივეს, ავად გახდება და ჩაწვება. არა, შეცდნენ მაგის მშობლები, არ უნდა წაეყვანათ საზღვარგარეთ.
ნაიჯელს სახეზე ერთი მუწუკიც არა აქვს ჯერ.
სამშაბათი, 6 იანვარი
ნათლისღება, ახალი მთვარე
ჩემი საწყალი ძაღლი!
ფოსტალიონს ველოსიპედის მანძილის საზომი ჩამოუგდო და მთელი იმის წერილები და ბარათები მიფანტ-მოფანტა. ალბათ, დაგვიჭერენ ან დაგვაჯარიმებენ. ვიღაც პოლიციელი მოვიდა და მკაცრად
ჩუქება
