- გეკითხები, როგორც მართლმადიდებელ მწერალს, შენი ნება რომ იყოს, ყოველი ქუჩის კუთხეში ეკლესიას თუ ააშენებდი და ყოველი შენობის თავზე ჯვარს თუ აღმართავდი?
- ჯერ ერთი, მე მწერალი ვარ, და არა სულიერი მოძღვარი, და მეორეც, მე მარტო მართლმადიდებლების მწერალი არ ვარ.
- ??
- რომ იცოდე, მე, როგორც მართლმადიდებლების, ისე არამართლმადიდებლების და შენ წარმოიდგინე, ათეისტების მწერალიც ვარ. ისიც გაითვალისწინე, რომ ამ ქვეყანაზე სხვა რელიგიის მიმდევრებიც ცხოვრობენ, რომელთაც, შეიძლება იმ ეკლესიისა და ჯვრის არ სწამდეთ, მე რომ მწამს. ეგეც რომ არა, ყოველი ქუჩის კუთხეში ეკლესია და ყოველი შენობის თავზე ჯვარი წარმოუდგენლად მიმაჩნია, რადგან ასეთ შემთხვევაში ეს ქვეყანა, გნებავს ქალაქიც, ერთ დიდ სასაფლაოს დაემსგავსებოდა. აბა, ერთი წუთით წარმოიდგინე, კაზინოების, ტოტალიზატორების, რესტორნებისა და ღამის კლუბების თავზე, ჯვარი რომ იყოს აღმართული. გეკითხები, ლამაზი და გამართლებული იქნებოდა ყოველივე ეს? რა თქმა უნდა, არ იქნებოდა. არადა, კაზინოებს, ტოტალიზატორებს, რესტორნებსა და ღამის კლუბებს ხომ არ დახურავ? მათ, კანონით, ისევე აქვთ ფუნქციონირების უფლება, როგორც ნებისმიერ სხვა ობიექტებს.