ჟურნალი „ფანტასტი“ პირველი ქართული სპეციალიზებული ლიტერატურული გამოცემაა, რომელიც ფანტასტიკას ეძღვნება. ჟურნალში გამოქვეყნდება სამეცნიერო ფანტასტიკაც, ფენტეზიც, ჰორორიც, მისტიკაც, აბსურდიც, სიურეალიზმიც, “მაგიური” პროზაც და ლიტერატურული ზღაპარიც. ჟურნალს გამოსცემს ამავე სახელწოდების ლიტერატურული კლუბი. ჟურნალისა და კლუბის მიზანია საქართველოში ფანტასტიკის, როგორც ლიტერატურული ჟანრის, პოპულარიზაცია და ახალგაზრდა, ნიჭიერი ავტორების აღმოჩენა და ხელშეწყობა. ჟურნალ „ფანტასტის“ პირველი ნომრის ძირითადი ნაწილი ეძღვნება გამოჩენილ ამერიკელ მწერალს, რეი ბრედბერის. კლუბის წევრებმა თარგმნეს მისი რვა მოთხრობა, აქედან ექვსი ქართულად პირველად ქვეყნდება. ასევე ნომერში დაბეჭდილია ბრედბერის ინტერვიუ და ქართველ ლიტერატორთა სამი წერილი მისი შემოქმედების შესახებ. ჟურნალის დანარჩენი ნაწილი ქართველი ავტორების ორიგინალურ მოთხრობებსა და ფანტასტიკისადმი მიძღვნილ წერილებს ეთმობა. ქართველ ავტორთა შორის არიან: მარიამ ცინცაძე, ინგა მილორავა, თამარ კოტრიკაძე, ლევან გელაშვილი, თამარ შანიძე, ლევან კაპანაძე, გიორგი ლოგუა, მიხეილ შაველაშვილი, ილია ბაბუნაშვილი, თორნიკე ბერიშვილი, ივა მინდაძე, გაგა ნახუცრიშვილი. ჟურნალის მთავარი რედაქტორია ირაკლი ლომოური. ილუსტრატორი - მალხაზ რუსაძე.