ჩვენი პროექტის მე-16 წიგნი სამხრეთ საქართველოს წმინდანებს ეძღვნება. წიგნი სამნაწილიანია, პირველ ნაწილში გავიხსენებთ „საქართველოს იმედის“ ხატზე გამოხატულ ღირს მამა სერაპიონ ზარზმელს; ღირს გიორგი ზარზმელს; ღირს პავლე ზარზმელს; ღირს მიქაელ ზარზმელს; ღირს ბასილი ზარზმელს; კიდევ ერთხელ მოგითხრობთ წმინდა სერაპიონის მოძღვარზე - ღირს მიქაელ პარეხელსა და წმინდა სერაპიონის თანამედროვე მღვდელმთავარზე, წმინდა გიორგი მაწყვერელზე. წიგნის მეორე ნაწილში მოგითხრობთ წმინდა ტბელ აბუსერიძეზე. წიგნის მესამე ნაწილი ეძღვნება წმინდა მოწამეებს, ვისაუბრებთ წმინდა მოწამე ძმებზე - დავითსა და ტარიჭანზე; მღვდელმოწამე თეოდორე აჭარელზე; წმინდა მოწამე კოლაელ ცხრა ყრმაზე; დუდიყვათსა და პაპათში (თანამედ. თურქეთი) XVII-XVIII საუკუნეებში ქრისტეს სარწმუნოებისთვის მუსლიმანთაგან წამებულ 300 მხედარზე, მღვდლებსა და მართლმადიდებელ ლაზებზე; ასევე მოგითხრობთ სამხრეთ საქართველოში სარწმუნოებისთვის თავდადებულ სხვა ქართველებზე...