ტყვეთა ტყვე

აქ მოთხრობილი ამბავი სულ ახლახან შევიტყვე და უფრო ადრე ამის დაწერა არ შემეძლო. მართალია, ხალხმა თავშეკავებულად, ძუნწად მიამბო, მაგრამ ბევრი რამ თეთრმა მთებმა მითხრეს, ზოგი კიდევ საჯიხვეებს წამოვაცდენინე და ბოლოს, ჩემი თვალით ვნახე ის ორი გამოქვაბული, სადაც ეს ცოდვა-ბრალი დატრიალდა. ომის შემდეგ აგერ ოცდახუთი წელი გავიდა და იქნებ აღარც ღირდა ძველი ტკივილების გახსენება, მაგრამ ეს ომი დედამიწის იმხელა ჭრილობა იყო, რომ ჯერაც არ შეხორცებულა. ჰოდა, მინდა გიამბოთ მშვენიერ გუცაზე, სვან გოგონა თაჯიზე და ბიჭების: თუთარის, ვახოს და გუას შურისძიებასა და გამბედაობაზე, ჯარისკაც სიოშზე, უჩინარ აბი ნანსყანზე და თერთმეტ გერმანელ დესანტზე...