თავი 1
საბნიდან ხელი გამოვიწვართე და ჯივზის, ჩემი მსახურის მოსახმობად ზარს ჩამოვრეკე.
- საღამო მშვიდობისა, ჯივზ.
- დილა მშვიდობისა, სერ.
პასუხმა ცოტათი გამაკვირვა.
- განა უკვე დილაა, ჯივზ?
- სწორედ რომ ასეა, სერ.
- დარწმუნებული ხარ, ჯივზ? გარეთ რაღაც ბნელასავით.
- ნისლია, სერ. შემოდგომა გვიდგას - ჟამი ნისლთა და ნაგრამის მოწევნათა, სერ…
- რისი ჟამიო?
- ნისლისა, სერ. და კიდევ - მოსავლის აღების.
- აჰა-ა, გასაგებია… იქნებადა ერთი ჭიქა ის შენი უკვდავების წყალი მომიმზადო, ჯივზ?
- უკვე მზადაა, სერ. მაცივარში მიდგას.
თვალის დახამხამებაში გაშპა და ისეთ მდგომარეობაში დამტოვა, სიცოცხლე რომ აღარ გინდა და ერთადერთ ნუგეშად ეგა გაქ, სულ მალე ისედაც წავიღებ წერილსო… საქმე ის იყო, რომ წინა საღამოს „საქმის კაცში“ თავისუფალ ცხოვრებასთან გამომშვიდობების საღამო მოვუწყვე გას ფინკ-ნოთლს: მედლინ ბასეტთან - ბრიტანეთის იმპერიის ორდენის კავალრის, სერ უოტკინ ბასეტის ქალიშვილთან ეპირებოდა ჯვრის დაფსკვნას. მოგეხსენებათ, ამგვარი საღამოები მძიმე გამონაყოლით თავდება ხოლმე და ახლა ისეთი გრძნობა მქონდა, თითქოს ვიღაც უღმერთო გავარვარებულ შანთს მირჭობდა ტვინში.
ბედი ჩემი, ჯივზმა ფეხის ათრევა არ იცის და როგორც კი მისი საიდუმლო რეცეპტურით შეზავებული სასმელი გადავკარი, წამსვე გონება გამინათდა, ცხოვრების ხალისიც მომეცა და ფანჯრის იქით თითქოს ჩიტების ჟღურტულსაც კი მოვკარი ყური.
- უჰუ-ჰუ-უუ! - შვებით ამოვისუნთქე, რაც შემეძლო ღრმად და ენაც ამოვიდგი:
- აბა, რა ხდება ახალი ქვეყანაზე, ჯივზ? ვხედავ, დილის გაზეთები უკვე ამოგიტანია.
- არა, სერ. ტურისტული გზამკვლევებია - სააგენტოში მომცეს. იქნებ გადაგეფურცლათ მაინც, სერ.
- და რატომ მაინცადამაინც მე, ჯივზ?
ამას მცირეხნიანი, თუმც კი მეტად მრავალმნიშვნელოვანი დუმილი მოჰყვა. ასეთ დროს ამბობენ ხოლმე - ანგელოზმა გადაიფრინაო. არ ვიცი, არ ვიცი… უნდა მოგახსენოთ კია რომ როცა ორი, ჩვენსავით შეუვალი ხასიათის მქონე ადამიანი ერთ ჭერქვეშ ცხოვრობს, მცირე შეხლა-შემოხლები მათ შორის უბრალოდ, გარდაუვალია. ახლაც სწორედ ამგვარ ვითარებასთან გვქონდა საქმე: ჯივზს ლამისაა გულის ფიცარზე ამოეჭრა - მსოფლიოს გარშემო სამოგზაუროდ უნდა გავსწიოთო, მე კი გაქირ ვირზე შევჯექი და უარს გახლდით. ამიტომაცაა, ამ ჩემს მსახურს ახლა დღეყოველ სულ ახალ-ახალი სარეკლამო პროსპექტები მოაქვს და ლოგინთან მილაგებს. მაგის შემხედვარეს სულ ის მონადირე ძაღლი მახსენდება, ყოველ განსაზღვრულ დროს, სასტუმრო ოთახში რომ იმ დღეს მის მიერვე მოღრჩობილ ვირთხებს ულაგებდა პატრონს და არა შეგონება - ეს შენ მოვალეობებში არათუ არ შედის, შემაწუხებელიც კიაო - არ ჭრიდა.
- ეგ ამოჩემებული ზრახვა შეგიძლია თავიდან ამოიგდო, ჯივზ.
- მოგზაურობა თვალსაწიერს აფართოვებს, სერ.
- ისედაც უკიდეგანოდ ფართო მაქვს, ჯივზ. ლამისაა, ცხვირწინ რა ხდება, ის ვეღარ შევამჩნიო… აი შენ კი, უბრალოდ, საკუთარი წინაპრების სისხლი გიყივის და ზღვის მარილიანი ქარის სუნი გცემს ნესტოებში! ეგრეა - როგორც მახსოვს, თავად გამიმხილე ერთხელ - წარმოშობით სკანდინავიიდან ვარო! მე კი ვიკინგების არაფერი მცხია და არც ბალის კუნძულელი ქალების ეგზოტიკური ცეკვები მხიბლავს… საზოგადოდ, უნდა მოგახსენო, რომ ამ ბონძღ ამერიკულ საოკეანო გემებს ჩვენი კოხტა, დინჯი სვლით მოარული ინგლისური მატარებლები მირჩევნია!
- თქვენი ნებაა, სერ.
მის ხმაში ოდნავი იმედგაცრუება კი იგრძნობოდა, მაგრამ არც ისეთი, ირონიაში გადასვლის უფლება რომ მიეცა თავისთვის და ამიტომაც ვარჩიე, დროზე შემეცვალა თემა.
- ისე, მაგრა კი ვიგრიალეთ გუშინ, ჯივზ!
- გეტყობათ, სერ.
- გასმა მოკითხვა შემოგითვალა.
- დიდად ვაფასებ მის გულისხმიერებას, სერ. იმედია, კარგ ხასიათზე ბრძანდებოდა, სერ.
- რაზეა ლაპარაკი! კაცი საცაა სერ უოტკინ ბასეტის სიძე გახდება… ღმერთს მადლობა, რომ ეს მისი ბედნიერი ხვედრია და არა ჩემი, ჯივზ!
უნებლიეთ, ეს ბოლო სიტყვები განსაკუთრებული გრძნობით ნათქვამი გამომივიდა და ახლავე აგიხსნით, რატომაც: სულ რაღაც რამდენიმე თვის წინ, როცა ნიჩბოსნობაში ინგლისის გამარჯვება ვიზეიმეთ, ბარიდან პირდაპირ კანონის მსახვრალ ხელებში აღმოვჩნდი - თურმე ნუ იტყვით და, თავგამოდებული ვცდილვარ პოლიციელის ჩაფხუტი მისივე თავისაგან გამომეცალკევებინა! ის ღამე განყოფილებაში, გარანდულ ფიცრებზე მეძინა, დილით კი სასამართლოში წამიყვანეს ბადრაგით და მთელი ხუთი ფუნტით დამაჯარიმეს… უნდა ითქვას, რომ მოსამართლედ სწორედ ეს ბ-ნი ბასეტი იჯდა და ბრბოც - ჩემდა გასაკვირად - დიდი კმაყოფილებითაც კი შეხვდა ამ უმართებულო სამართლის განჩინებას!
როგორც შემდგომ აღმოჩნდა, ეს მისი ერთი უკანასკნელ სარჩელთაგანი ყოფილა, რაკიღა სულ მალე ვიღაც შორეული ნათესავის
ჩუქება
