კოზმასა და დამიანესთან ახლოს

სტუდენტი გოგონა და ცნობილი ჟურნალისტი ერთმანეთთან საუბრისას შემთხვევით შეეხებიან საბჭოთა იდეოლოგიის ერთ-ერთ სახეს - ახალგაზრდა პარტიზან გოგონას. ჟურნალისტი ცდილობს სტუდენტის დახმარებით გაერკვეს – რამდენად აქტუალურია ეს თემა თანამედროვე საზოგადოებისთვის. იქნებ უფროს თაობას, რომელიც განთავისუფლდა საბჭოთა სისტემისაგან, აღარც უნდა მისკენ მიბრუნება, იქნებ ახალგაზრდა თაობისთვის, ვისთვისაც უცხოა სოციალისტური წარსული, არაფრისმთქმელია ეს ისტორია. ორივე თავის გასაკვირად აღმოაჩენს, რომ ისტორია ცოცხალია და ადამიანებს დღემდე კარგად ახსოვთ. თუმცა მოვლენათა გააზრებასა და შეფასებაში მათი აზრი განსხვავებულია. სხვანაირად ჩნდება ახალგაზრდა პარტიზანის სახეც. ჟურნალისტისა და სტუდენტის აზრიც ხშირად იყოფა. ჟურნალისტი აღარაა დარწმუნებული, რომ ეს ისტორია შეიძლება ფართო აუდიტორიისთვის აქტუალურინ იყოს. სტუდენტის შეფასებები და ქმედება კიდევ უფრო რადიკალურია და ჟურნალისტის ეჭვებს აღრმავებს.