სიმონ დე ბოვუარი (1908-1986) – ფრანგი მწერალი ქალი, ფილოსოფოსი, ფემინისტური მოძრაობის იდეოლოგი, ფრანგი ფილოსოფოსის, ჟან პოლ სარტრის უახლოესი მეგობარი და თანამოაზრე. ბოვუარი ქალთა პრობლემებზე წერდა. მისი აზრით, ეს სამყარო შექმნილია მამაკაცებისთვის, ქალი კი მუდმივად კაცობრიობის მეორე ნახევრის როლშია და დროა, ღირსება აღიდგინოს, დამოუკიდებელი გახდეს. 1967 წელს გამოქვეყნდა ბოვუარის ნაწარმოები „სასოწარკვეთილი ქალი“ – სამი პატარა რომანი, რომელშიც სამი ქალის ამბავია მოთხრობილი. სამივეს მუდამ თან სდევს მარტოობისა და სიკვდილის შიში. ერთ პარიზულ დილას ლიტერატურათმცოდნე ქალი, ახალ წელს მარტოდ დარჩენილი მიურიელი და სამოგზაუროდ წასული მონიკა შინაგან მონოლოგს იწყებენ. მკითხველი კი თითქოს სასოწარკვეთილ ქალთა პრობლემების თანამონაწილე ხდება.