მესისთვის ერთი კაცის მოტყუება ისევე იოლია, როგორც მზესუმზირის კნატუნი. იგი გაცილებით უკეთ გრძნობს თავს, როცა რამდენიმე მეტოქე ეხვევა, თავისუფლად შეუძლია 4-5 მოწინააღმდეგისგან თავის დაღწევა და კარის დალაშქვრა. ასეთ ფეხბურთელებს ქართველი გულშემატკივარი ყოველთვის დიდ პატივს სცემდა. ვუყურებთ ლიონელ მესის ჯადოსნურ ოინებს და უფრო გვიყვარდება ფეხბურთი. მესისებრი ნიჭის ფეხბურთელი დედამიწაზე, შეიძლება, ბევრი დაბადებულა, მაგრამ ხუთი კაცის მოტყუების შემდეგ თუნდაც ჩემპიონთა ლიგის ფინალამდე ვერ მისულა. რატომ? საინტერესოა, რა გზა გაიარა ლეომ, ვიდრე ჩემპიონთა თასს ოთხჯერ მოიგებდა, მსოფლიოს საუკეთესო ფეხბურთელისთვის განკუთვნილ „ოქროს ბურთს“ კი ოთხჯერ აღმართავდა... ამ წიგნში სწორედ ის დაბრკოლებებით სავსე გზაა აღწერილი, რომელიც ვარსკვლავმა არგენტინის ქალაქ როსარიოდან ესპანეთის ქალაქ ბარსელონამდე, გახრიოკებული მოედნიდან „კამპ ნოუს“ ხასხასა მოედნამდე გაიარა. იყო დიდი ალბათობა, ავადმყოფობისა და უსახსრობის გამო პატარა ლეო ფეხბურთს ჩამოშორებოდა და მსოფლიოს ისტორიაში ერთ-ერთი ყველაზე კაშკაშა ვარსკვლავი საფეხბურთო ცაზე არც გამოჩენილიყო.