ნათანიელ ჰოთორნი (1804-1864) ამერიკული ლიტერატურის საყოველთაოდ აღიარებულ ოსტატებს შორის ერთ-ერთი პირველია. მან დიდი წვლილი შეიტანა მოთხრობისა და ნოველის ჟანრის შექმნაში და რომანტიზმის ლიტერატურა ალეგორიისა და სიმბოლიზმის ელემენტებით გაამდიდრა. პირველი რომანი წარუმატებელი გამოდგა, მას მოჰყვა მოთხრობების კრებული, რომელსაც მეტი წარმატება ხვდა წილად.1842 წელს თავისი საუკეთესო ნოველები შეკრიბა, რომლებიც ისტორიულ და ზებუნებრივ სიუჟეტებზე იყო აგებული და კრებულად გამოსცა. 1850 წელს გამოქვეყნდა მისი პირველი წარმატებული რომანი „ალისფერი ასო“, რომელმაც ფართო აღიარება მოუტანა ევროპაში და ბესტსელერად იქცა, თუმცაღა დიდი შემოსავალი არ მოჰყოლია. შემდეგ წელს კიდევ ერთი რომანი გამოსცა. ჰოთორნის ნაწარმოებების მხატვრული ფორმის სრულყოფილება და მათი ზნეობრივი პრობლემატიკის სიღრმე ბევრ ახალგაზრდა ლიტერატორზე ახდენდა გავლენას. მათ შორის ჰენრი ჯეიმსზე, ჰერმან მელვილზე, რომელიც მის გვერდითაც დასახლდა და ჰოთორნს მიუძღვნა რომანი „მობი დიკი“, „მისი გენიის წინაშე ქედის მოდრეკის ნიშნად“.