ავტორისაგან
ჩემი „წიწამურის ტრაგედიის საიდუმლოს“ გამოქვეყნებიდან რვა წელზე მეტი გავიდა. ამ ხნის განმავლობაში, ჩემთვის ამჯერად სხვა საინტერესო საკითხების გარდა, კვლავაც მიხდებოდა აღნიშნულ საკითხთან დაკავშირებული საისტორიო წყაროების გაცნობა, აქედან გამომდინარე, ახალი ფაქტების დადგენა. შესაბამისად, ვფიქრობდი, ხელმეორედ დამებეჭდა ეს წიგნი. საქართველოს ისტორიაზე ჩაფიქრებულ ნაშრომზე მუშაობამ, დასახული ამოცანა გადამადებინა, მაგრამ თენგიზ სიმაშვილისა და ნოდარ გრიგალაშვილის მცდელობებმა, ახლებურად გადაეწყვიტათ ილიას მკვლელობის პრობლემა, მაიძულა მათთან საკმაოდ სერიოზულ და ხანგრძლივ პოლემიკაში ჩავბმულიყავი. ნაწილობრივ ამას შევეხე 2011 წელს დაბეჭდილ ჩემეულ წიგნაკში „მეცნიერების პროფანაციის მაგალითები“. ახლა კი მკითხველებს შემოგთავაზებთ უფრო ვრცელ კრებულს, რომელიც მნიშვნელოვანწილად აღნიშნული პოლემიკისადმი არის მიძღვნილი.