გამომცემლისაგან
ძნელად თუ მოიძებნება კაცი, ბავშვი თუ მოზრდილი, განძის პოვნაზე რომ არ ეოცნებოს. განგების ნებით, ზოგი პოულობს კიდეც, როგორც ”გამოცხადების” გმირი. მაგრამ რაოდენ დიდი ბედნიერებაც უნდა იყოს ურიცხვი თვალ-მარგალიტის საგანძურის აღმოჩენა, იმაზე დიდი სიხარული, ალბათ, არ არსებობს, ვიდრე ამ სიმდიდრის არდაშურება და მოხმარებაა მოყვასისთვის, ახლობელთა ერთობლიობის - მშობელი ქვეყნისათვის. სწორედ ამ თემას - ნაპოვნი განძის სწორად განკარგვის ბედნიერებას ეძღვნება ეს პატარა წიგნი.
ნებისმიერი მწერალი თუ ჟურნალისტი, ვინც მე მიცნობს, დამემოწმება: როგორც უნდა მიჭირდეს, თუ ნაწარმოები არ მომეწონა, რაოდენ ცნობილ ავტორსაც უნდა ეკუთვნოდეს, მის გამოცემას ვერ მოვკიდებ ხელს. ეს თავგადასავალი კი ხელნაწერშივე ძალიან მომეწონა, და სულ ათიოდ დღეში გამოვეცი.
და თუ მე წიგნის რაიმე გამეგება,- საგამომცემლო საქმეს კი ათეული წლებია, ვემსახურები, დარწმუნებული ვარ, თქვენც მოგეწონებათ.
წაიკითხეთ...
მამუკა ხანთაძე
ვუძღვნი ჩუბჩიკას, თენგიზ მირზაშვილის ნათელ ხსოვნას