"ნამგეი დულა" შედგება ოცდაოთხი მცირე ზომის მოთხრობისა და ავტორისეული წინათქმისაგან, სადაც რადიარდ კიპლინგი მიგვითითებს: "ეს მოთხრობები შეგროვილია ათას კუთხეში, ყველა ჯურის ხალხში; ჩუბარას ბერებმა, ალა იარელმა მეჩუქურთმემ, ხურომ, ჯივუნ სინგჰმა, ორთქლის გემებსა და მატარებლებზე შემხვდურმა უცნობებმა, საღამოს ჟამს, თავიანთი სახლკარის წინ ხელსაქმით გართულმა ქალებმა, აწ გარდაცვლილმა და საფლავს მიბარებულმა ოფიცრებმა და ჯენტლმენებმა და სხვათა მრავალთ მომითხრეს ისინი" ერთი სიტყვით, ავტორმა გაგვანდო, რომ თითქოს მხოლოდ მისი დმსახურება არ არის ამ მშვენიერი მოთხრობების შექმნა. მას "თანაავტორებად" ჰყავდა კონკრეტული ადამიანები. ამიტომაც შეიძლება ითქვას, რომ რადიარდ კიპლინგის ნაწარმოებები ხალხის წიაღიდან ამოფოთლილი და თითქმის გახალხურებული ქმნილებებია.