ცნობილი მწერალი, კინორეჟისორი და მსახიობი ვასილ შუკშინი (1929-1974) ერთ-ერთი უპირველესი იყო იმ მცირერიცხოვან ხელოვანთა შორის, რომლებიც საბჭოთა სისტემისა და „სოციალისტური რეალიზმის“ სულისშემხუთველ ატმოსფეროში გამომაცოცხლებელ, გამაჯანსაღებელ ჟანგბადად მოევლინენ საზოგადოებას. ძალიან დიდი იყო ვასილ შუკშინის პოპულარობა. იგი თავისი შემოქმედების ყველა ასპარეზზე თითქმის თანაბრად ძლიერი და შთამბეჭდავი იყო, მაგრამ მისი მძლავრი ნიჭი ყველაზე მეტად ალბათ მაინც პროზაში გამოვლინდა. „რუსული ლიტერატურის უკანასკნელი გენიოსი“, - ასე შეაფასა რუსმა მწერალმა ვიაჩესლავ პიუცუხმა ვასილ შუკშინი.