ლალი ყარალაშვილი პროფესიით ქიმიკოსია. ათეული წლების მანძილზე მუშაობდა ახმეტის რაიონის სოფელ ქისტაურის რაფიელ ერისთავის სახელობის საშუალო სკოლაში ქიმიის მასწავლებლად. ჩვიდმეტი წელი (პენსიაზე გასვლამდე) იყო ამავე სკოლის დირექტორი. ქალბატონმა ლალიმ შემოქმედებითი საწყისი შეიტანა ქიმიის გაკვეთილებში. მის წარმატებულ პედაგოგიურ მუშაობასა და ქიმიის საღამოებზე წერდა როგორც ქართული, ისე საკავშირო პრესა. ლალი ყარალაშვილი მრავალმხრივი მოღვაწეა - თანამშრომლობს ჟურნალ-გაზეთების რედაქციებთან, მონაწილეობას იღებს სხვადასხვა კონკურსებსა და კონფერენციების მუშაობაში, არის ბევრი შესანიშნავი ღონისძიების ინიციატორი, წერს მშვენიერ ლექსებსა და პოემებს. 2010 წელს ნაშრომისათვის „განსაჯე თავი შენი“, რომლის რედაქტორია ქალბატონი ლეილა ბაგრატიონ-ბაბადიში, შემოქმედ პედაგოგთა კონკურსზე მიღებული აქვს იაკობ გოგებაშვილის საიუბილეო მედალი და საპატიო სიგელი. წინამდებარე ნაშრომი ცხოვრებაზე დაკვირვებული ადამიანის ნააზრევია, რომელიც მკითხველს მრავალ საჭირბოროტო საკითხზე დააფიქრებას და უკეთესი მომავლისაკენ უჩვენებს გზას.