ყოველწლიურად კლებულობს ტრადიციული გაზეთების მკითხველთა და სატელევიზიო ახალი ამბების მაყურებელთა რიცხვი, მიუხედავად იმისა, რომ ალტერნატიული საინფორმაციო საშუალებები სწორედ ბეჭდვითი მედიისა და ტელევიზიის უნიკალური ძლიერი მხარეების ათვისებით ცდილობენ თანამედროვე ჭირვეული და მოუთმენელი მომხმარებლის მოზიდვასა და შენარჩუნებას. რა არის ეს ძლიერი მხარეები? სწორედ ყველაფერი ის, რაზედაც გამახვილებულია ყურადღება „სატელევიზიო რეპორტაჟის მომზადებისა და ტელეჟურნალისტიკა: ვიზუალური თხრობის გზამკვლევი” ამ, მეექვსე გამოცემაში. აქცენტები ამ წიგნის ბაზარზე არსებობის მთელი ოცდახუთწლიანი ისტორიის მანძილზე დიდად არ შეცვლილა: გამოსახულების, სიჩუმის, ბგერების, მოქმედებისა და ქცევის საშუალებით ადამიანებისთვის ადამიანების ჩვენება და თანამონაწილეობის განცდის დაჭერა და გადმოცემა. გარდა ამისა, წინამდებარე გამოცემაში პრაქტიკოსი პროფესიონალების თვალსაწიერიდან ვისაუბრებთ აგრეთვე იმაზედაც, თუ როგორ შეიძლება იმავე მიზნების მიღწევა, როდესაც ადამიანი მუშაობს მარტო, როგორც თვითკმარი ვიზუალური ჟურნალისტი, ვიზუალური მთხრობელი. ახალ გამოცემაში ნახავთ ყველაფერს, რაც დაგჭირდებათ მუშაობისას, როგორც ვიზუალურ მთხრობელს, მაშინაც კი, თუ ყველაფრის - გაშუქების, გადაღების, წერის, მონტაჟის - დამოუკიდებლად კეთება მოგიწევთ. ეს წიგნი ბოლო მეოთხედი საუკუნის განმავლობაში სპეციალისტებსა და სტუდენტებს განუმარტავდა და მოასწავებდა ვიდეოკომუნიკაციის სფეროში მომხდარ და მოსახდენ სიახლეებს, უახლეს მიდგომებსა და ტექნოლოგიებს.