დავიბადე 1988 წლის 28 ივლისს, თბილისში. ბავშვობიდან ვწერდი, მოზარდობისას დავდიოდი მანანა ბეგიაშვილის ლიტერატურულ-შემოქმედებით სახელოსნოში. ფაკულტეტებსა და სხვადასხვა პროფესიებზე ბევრი წანწალის შემდეგ, საბოლოოდ, ხელოვნებათმცოდნეობა დავამთავრე თსუ-ში. ამ კრებულში შესულია ჩანახატები და ლექსები. არსებობს წიგნის ნაბეჭდი ვერსიაც, რომელიც მხოლოდ ახლო მეგობრებსა და ნათესავებში დარიგდა, თუმცა ამ გამოცემისთვის დავამატე სხვა ნაწერებიც, ზოგიც ამოვიღე. წიგნი შეიცავს 2002 წლიდან 2008 წლამდე დაწერილ ტექსტებს, ანუ 15 წლიდან 19 წლამდე. 19 წლისას, ძალიან ბევრი რამ დასრულდა და სრულიად სხვა რეალობის წინ აღმოვჩნდი. 19 წლამდე ნაწერებს აერთიანებს კითხვა "ვინ ვარ მე?", ხოლო 19 წლის შემდგომ პერიოდს, "რა ვარ მე?". თუმცა, როგორც მერე აღმოჩნდა, კიდევ სხვა ბევრი კითხვითი სიტყვა დამატყა თავს და ახლა, იქამდე მივედი, რომ ისინი საერთოდ აღარ არსებობენ ჩემთვის.