ზღაპრები ბექნა ბიჭზე

„არცა რა იყო არაფრისა, არც რა ჰქონდათ არაფრისი, ამბავი იყო ზღაპრად თქმული, ამ ცისა და ამ ბარისი," - ასე იწყება ბონდო მაცაბერიძის ნახევრად ლექსადთქმული გერმანულ ენაზე ნათარგმნი ზღაპარი. ბექნა ბიჭი, მართალია, ერთი ციცქნაა, მაგრამ ხისგან ნათალი შურდულით, მშვილდ-ისრებით, გორდა ხმლებით, ოროლებით, თოფებით და დამბაჩებით გახლავთ აღჭურვილი! რისთვის შეიარაღებულა, საით გაუწევია, რა გმირობა ჩაუდენია და ვის შებრძოლებია - ამას ცხრა დღის ამბიდან შეიტყობთ. ბოლოს კი იმის მოწმე გახდებით, გოლიათი ბაყბაყდევი თავის ცელქ შვილ დევიკუნას როგორ მიაბარებს ბექნას და სთხოვს, გამოაზამთრებინეო. არ გჯერათ? იმიტომ რომ ჯერ არ იცნობთ ახალ გმირს და არც ის იცით ახალი ზღაპარი როგორ მარტივად და ორიგინალურად მთავრდება - ერთი ჯადოსნური სიტყვით: "ფა-ფუ!"