კარლო კაჭარავას ბიოგრაფია
კარლო კაჭარავა დაიბადა 1964 წლის 7 თებერვალს. ორი წლის იყო, როცა გარდაეცვალა მამა, კარლო კაჭარავა (ინჟინერი, საქართველოს რკინიგზის სამოქალაქო შენობა-ნაგებობათა უფროსი). მამის გარდაცვალებიდან 5 თვის შემდეგ გაჩნდა კარლოს და, ლია. ადრე წასული მამის ხატი და მისი თანმყოფობა შვილებთან კარლოს შემოქმედების ერთ-ერთი განმსაზღვრელი თემა გახდა. ბავშვობიდანვე ხატავდა და წერდა ლექსებს. ქართული ლიტერატურა შეასწავლა დედამ, გოგუცა ლიპარტიამ (ფილოლოგი, ქართული ენისა და ლიტერატუტის მასწავლებელი). 1986 წელს წარჩინებით დაამთავრა თბილისის სახელმწიფო სამხატვრო აკადემიის ხელოვნებათმცოდნეობის ფაკულტეტი. იყო გამორჩეული სტუდენტი, შემდგომ – თავისი თაობის წარმატებული ხელოვანი, გასაოცარი ერუდიციის პროფესიონალი, ამავე დროს – იუმორის გრძნობით დაჯილდოებული, მეგობრებით გარემოცული პიროვნება. 1986 წელს გაიწვიეს სავალდებულო სამხედრო სამსახურში, სადაც სულ ნახევარი წელიწადი დაჰყო. ის მოხვდა არხანგელსკის ოლქში, საბჭოურ დახურულ სამხედრო ქალაქ მირნიში. მკაცრ და განსხვავებულ გარემოში მიღებული პიროვნული გამოცდილება კარლო კაჭარავას პოეტური შემოქმედების მძლავრი იმპულსი გახდა. 1987 წლიდან იყო გიორგი ჩუბინაშვილის სახელობის ხელოვნების ისტორიის ინსტიტუტის უმცროსი მეცნიერ-თანამშრომელი. მისი სადისერტაციო თემა იყო „ქართული ავანგარდი“. მეგობარ მხატვრებთან ერთად (მამუკა ცეცხლაძე, გოგა მაღლაკელიძე, გია ლორია) 1984 წელს დააარსა ჯგუფი „არქივარიუსი“, რომლის საფუძველზეც 1986 წელს შეიქმნა უფრო ფართო ჯგუფი „მეათე სართული“. იყო ჯგუფის მანიფესტის ავტორი და ლიდერი; იყო ჟურნალ „ლიტერატურა და ხელოვნების“ სარედაქციო კოლეგიის წევრი, ახალგაზრდა კრიტიკოსთა ასოციაციის გამგეობის წევრი. მონაწილეობდა ახალგაზრდა მეცნიერთა სიმპოზიუმში (ბაკურიანი, 1988), ავანგარდისტული ხელოვნების პირველ საბჭოთა ფესტივალში (ნარვა, 1988), ხელოვნებათმცოდნეთა საერთაშორისო სემინარში (პალანგა, 1988), ხელოვნებათმცოდნეთა საკავშირო სემინარში (სენეჟი, 1989), საერთაშორისო ფესტივალში MARS (პარიზი, 1990), საერთაშორისო ფესტივალში BIაფ (ბარსელონა, 1990). მუშაობდა ფრანსუაზა ფრიდრიხის გალერეაში (კიოლნი, 1991). არის 40-მდე გამოფენის მონაწილე, 30-ზე მეტი სამეცნიერო-კრიტიკული ნაშრომის ავტორი. მისი ნახატები დაცულია მოსკოვის, ნიუ-იორკის, ლონდონის, ჰელსინკის, ბარსელონას, პარიზის, ბერლინის გალერეებში, მუზეუმებსა და კერძო კოლექციებში. 1994 წლის 9 აპრილს 30 წლის ასაკში კარლო კაჭარავა ანევრიზმით გარდაიცვალა. მისი გარდაცვალების შემდეგ საქართველოსა და აშშ-ში მოეწყო მისი ნახატების 10-ზე მეტი პერსონალური გამოფენა, მათ შორის – გამოფენა წინანდალში, ალექსანდრე ჭავჭავაძის სახლ-მუზეუმში. გამოიცა კარლო კაჭარავას საავტორო გაზეთის ნომერი (1994), მისი ნაწერების ორტომეული (2006). სიკვდილის შემდეგ ხელოვნებათმცოდნეობაში შეტანილი განსაკუთრებული წვლილისათვის მიენიჭა გიორგი ჩუბინაშვილის სახელმწიფო პრემია (1997). მისი შემოქმედებითი მემკვიდრეობა შეადგენს 900-მდე ფერწერულ ტილოს, 3500-მდე გრაფიკულ ნამუშევარს, 1500-მდე პოეტურ ტექსტს – ლექსსა და პოემას, ჩანაწერების არაერთ წიგნაკს.
ჩუქება
