კოლექტიური კულტურული იდენტობა მეტად რთული, მრავალგანზომილებიანი, ცვალებადი და განგრძობადი ფენომენია. დღესდღეობით კულტურისა და ისტორიის მიმართულების კვლევებში ამ ფენომენის გაუთვალისწინებლობა წარმოუდგენლად გვესახება. განსაკუთრებით მნიშვნელოვან ფაქტად მივიჩნევთ ასეთი ფენომენის კვლევის აქტუალიზაციას. ქართული ერთობის მრავალსაუკუნოვანი ისტორიის რეკონსტრუქცია ერთი გამოკვლევის ფარგლებში და ერთი ავტორისთვის ძნელად დასაძლევი ამოცანაა. ამიტომ გადავწყვიტეთ, ჩამოგვეყალიბებინა სამეცნიერო ნაშრომთა სერია “ქართული ერთობა და მისი იდენტობა: იდეები, სიმბოლოები, პერცეფციები” და მონოგრაფიული ნაშრომების ციკლის მეშვეობით წარმოგვედგინა ქართული იდენტობის განვითარების მრავალმხრივი სურათი სხვადასხვა ისტორიული ეპოქისა თუ კულტურის სხვადასხვა პლასტის აქცენტირებით.